حسبي الله

ادرس ياوطن
اني امتحنتك ليش
المفروض منك تاخذ انت اعفاء
ناجح ماادري راسب ماادري طحت اكمال
مجموعك شعب شيجمعة صار اجزاء
اقرالك درجتك كلهة بالتفصيل
وانطيك النتيجة وتفرح وتستاء

خذت بالغة مية ع العروبة البيك
وصفر كل العرب من الالف للياء
لان كلك قواعد ياوطن مملؤ
صرت اشطر بلد عمي انت بالاملاء
ولهذا السبب كسلان بالاعراب
ولهذا السبب ليهسة ماكو انشاء

ايران واختها يرفعن الخيرات
وينصبن قواعد ترسن البيداء
وفعل ناقص تعربة
شعبك المسكين مفعول به بل حتى بالاباء
والفاعل تعرفة وتبني للمجهول
تحالف مستتر تقديرهم اعداء
وبغداد واختهة اعربهن بياحال مكسورات خاطر هية والحدباء

واكسل بلد انت بالرياضيات
يحكمونك جبر وتكول بالاستفتاء
واحنة بدائرة وطول المحيط اذياب
والمركز عميل ونص قطرنة اعداء
مثلث سني جنة وشيعي متحدين
كسرتوا ضلوعنة ومامكتفي بما جاء
ضربتنة وقسمتنة ونقصتنة هواي
وبعد ماننجمع حاصل جمعنة اشلاء

وباوعت على شعبك شفتة كلة اموات
ونطيتك صفر ياوطن بالاحياء

وعفيتك بالزراعة وهسة اكولك ليش
لان صارت فحم كل ارضك الخضراء

ولان اكثر بلد تنزرع بي عبوات
اسئلة الزراعة تحلهة بالكيمياء

خيرك ينسرق سراقة معروفين
حتى الاعمى اسئلة يكولي هؤلاء

لازم ياعراق تعيد بالتاريخ
اكتب من جديد وامسح الاخطاء
خلص عمرك حرب على الماكو شئ ملموس
اكتب مات داحس واعقر الغبراء....
...........وعوف الجامعة ومن عمروموسى ارتاح.................
وامسح كل بلد ضم راسة وقت الضيق
وامسح كل رئيس ودولتة الخرساء
...
.

واكتب!

اكتب؟!

شيكتب؟

اذا هذا حالنة

الصورة مع الكلمات منقولة بتصرف