آه....آه يا بهيه

يا أم طرحة وجلابيه

وشبشب زنوبه

وإيد مكنسة لهلوبه

تعبنا وإتزقلنا فيكى

بميت طوبة وطوبه

أرحمينا بقا يا بهيه!

من عيالك الهمجيه

ومن إيد البلطجيه

و لسان السرسجيه

آه...آه تعبنا كفايه!

آه... آه يا بهيه! 

أه يا أم ملاية لف

خدنا من عساكرك

ميت كف وكف

كفاية يا أم ملاية لف

كفاية من العبايه

ميت صنف وصنف

وكفاية دولارات متهربه

وكفاية تهليب وخطف

ولا أتكتب عليكى

خفة الإيد والظُرف!

آه...آه يا أم التعابنين

خلاص قربوا يدونا

بدل الإسبريين كوكايين

وبدل فنجان القهوه

سم الحيات والتعابين

آه... أتكلمى وأصرخى

يا أم الآرامل و المدبوحين

آه... يا بهية النصابين!

حرمت أحبك يا بهيه

وهأحبك حب الملاعين

حب اللى يسرق فلوسك

ويهرب على بلاد

الأبالسة والشياطين

آه ...آه يا بهيه

يا أم ملاية لف مخبيه

تحتها ميت حية وحيه!

آه.... آه يا بهيه

هأتفوقى إمتا؟

يا أم الناس الطيبين!

فوقى بقة قبل ما

تلاقينا كلنا ميتين!

وتصبح ثورتنا

ثورة المنسيين!