حبيبتي لازم نفترق

حبيبي بعد غياب
شاهد عليه الزمن
راجع تقولي خلاص
راح علينا الزمن
لازم نفارق بعضنا
مبقاش ينفع حبنا
مبقاش يلزم عهدنا
معدش باقي مننا
غير كلمة طارت في الهوا
غير نظرة ضاعت في الفضا
غير لمسة تايهة في الندا
تدور على دنيا الحب مش لاقياها
على دنيا الوفا...مش عارفاها
على أرض الخير...مش موجودة
على سما النور...مش معروفة
على دنيا تانية
يمكن فيها الحب يتوجد
يمكن فيها الوفا يتعرف
يمكن فيها الندا يتلمس
يمكن فيها حبيب يلاقي حبيبه
من غير غش و خداع يصيبه
حبيبتي الدنيا دي مش مخلوقة لنا
مخلوقة لوحوش و ديابة
تنهش و تاكل في بعضها
مخلوقة لقوي ياكل الضعيف
يدوس على الحب و الوفا
على الاخلاص و الدفا
و كله في سبيل المال مسموح
كله عشان الصعود ممنوح
حبيبتي لازم نفترق
يمكن في يوم من تاني نتولد
في دنيا تانية نتجمع
لا فيها غدر و لا خوف
و لا حزن و لا دموع
و لا يمكن يومها نفترق
حبيبتي لازم نفترق

بقلم:سارة الليثي