ثقافة بدنا نفرح بغزة..!

كنت بحفلة لصديق بدو يتزوج في شمال قطاع غزة، وكان جايب ستيريو.. والساعة 8 بدأت الموسيقى اتدق والشباب بدت تهز.. وأنا كنت مبسوط كثير.. لأنه الناس فرحانة.. وكان نفسي أرقص بس قلت في عقلي يا عمي إنت صحفي والناس بتشوفك على التلفزيون وهان وهان.. وإنت رسمي.. وبلاش فضايح.. !
بعد نص ساعة من الحفلة صرت أطلع بوجوه الناس.. ولقيتهم طايرين من الفرح والرقص.. وكل واحد فيهم بيطلع اللي جواه..! وبيعبر عن حقيقته، وهيا حقيقة الفرح..! واللي مايك بنته الصغيرة وبيلاعب فيها.. واللي ماسك إيد صاحبوا وبيقلوا يلا انبسط أنا بحب أشوفك هيك، وهيني مبسوط وفرحان مثلك..!
فكرت شوية وقلت طيب مهوا ممكن تلاقي أجنبي مثلا دكتور ولا مدير وبيكون مشهور ومتقن شغله مية المية..! ولكن لما بيخلص شغله بيروح يرقص ويحتفل وحتى بيشرب وسكي، وما حدا بيحكي عليه اشي..! وفي جامعات أوروبا بتلاقي دكتور جامعة لابس تنورة وما حدا بيطلع عليه..! فما بالكوا إنه إحنا بس بدنا نفرح مش أكثر..! لا بدنا نلبس تنورة ولا حلق..!
طيب إحنا ليش هيك مخنوقين بتفكيرنا..! ليش البرستيج قاتلنا..! وليش حرام الدكتور والصحفي والممرض والمحامي ما يفوع ويطلع الكبت اللي جواه ويرقص، وليش الناس بدها إياه بس يشتغل ويروح على السوق وبعدين على الجامع وبعدين على النوم..!
ليش إحنا بنكون مبسوطين وبنفرح لما يقولوا فيه اجتياح ولا قصف، وبنصير نقول والله عنجد طيب تمام.. والله فيه قصف يبقى حريقة ولعت..! عنجد فيه شهيد..! طيب هات تنروح..! ولما بيكون فيه حفلة زواج بتلاقي الناس بتستنى مين بدو يرقص مشان ينموا عليه..! ومين بدو يغني مشان يضربوه..! ومين بدو يهز مشان يشوفوا شكله وهوا مش رسمي ويتمسخروا عليه..!
بالآخر لما أجت أغنية يا بحرية قمت بسرعة، وقلت أنا حر واللي بدو يكون رسمي يكون..!

إحنا حقيقتنا ناس فرحانين ومبسوطين..! وناس بدها تعيش مطمئنة ودايما تضحك..! بس الناس اتعقدت..!

بالنسبة لبكرة شووو..!