ثقافة المجتمع

كم مره ارتفع ضغطك وقلت ( ياخي فيه اختراع اسمه اشاره ) وانت لك ساعة واقف عند تقاطع والباشا يتمتخر على اقل من مهله وتتفاجئ انه لف بدون يدق اشاره .
وكم مره قلت ( شوف اللي ما يستحي والله مايسقط ) وانت صاف عند ( U ) وقدامك سياره ووراك الف سياره وتشوف ( اللي مايستحي ) يتجاوز السيارات و ( يسقط ) عليهم وكأنهم صف ( صبات )
لا ومن شين الطباع اذا انحشر وقف بجنبك وناظرك يبتسم ويأشر بيده يقاله يستاذن ابو الشباب .
وكم مره قمت تسب وتشتم وتلعن وانت تلف بسيارتك تدور موقف وتحصل واحد ( راز ) سيارته وعارضها في موقف سيارتين . وكم مره قلت ( الله لا يضيق علينا )اذا جيت تركب سيارتك وحصلت ( لا مبالي ) ملصق سيارته بجنب سيارتك لدرجة انك ما تقدر تفتح بابك وتركب والمصيبة والطامة اذا كنت ( دب ) .وكم مره قلت ( الله يسد باب رزقك ) وانت طالع مستعجل وتحصل ( ثور ) مقفل عليك وتنلطع نص ساعه تدق بوري وهو ( مصدر لك الطرشااا ) والمرور ماعندك أحد .
وكم مره قمت ( تحسبل وتحقول ) وتلقب عيونك في الشارع ومشغل اصبعك الابهام والسبابه مره على الشنب ومره في الخشم وانت واقف عند صراف الي وابو الشباب داخل الصرافه و ( ستين الف ) مره يدخل البطاقة ويطلعها ومنطش اللي وراه لا يطلب مساعده ولا يعدي الدور لغيره . وكم مره قلت ( ظرف طارئ مسكين ) لواحد جاك وانت صاف سرى وقالك رحلتي بعد ساعه وتتفاجئ بالحبيب ( مكشت ) في مطعم بخاري.
وكم مره قل ( يهب ) وانت ماشي في طريقك بأمان الله وشطفك واحد طاير طيران منخفظ من يمين .وكم مره قلت ( شوف الحمار بغى يحرقنا ) وانت في طريقك واذا عقب سيجارة يتطاير شراره قدامك . وكم مره قلت ( ياخي الناس ذي ما تفهم ) وانت تدور مكان نظيف في حديقة او كورنيش علشان تجلس فيه ولا تحصل.وكم مره قلت ( متى نتطور ) وانت جالس بكوفي شوب او مطعم والبلوثوثات عن يمينك وشمالك ومن فوقك . وكم مره شفت ( عرابجة الالفية الثالثة ) وهم ( يتهايطون )على عامل او موظف . وكم مره قلت وانت تتعجب ( مسكين الحب نزل عبيد الله من الضلعان ) وانت تقرأ انواع الغزل وعبارات الحب على الجدران .
وكم مره وكم مره عصبت وتعجبت وبكيت وضحكت وانت تسمع وترى سلوكيات وتصرفات لا يقبلها اي مجتمع متحضر تصدر من ناس يحتاجون (عشر سنوات ) علشان تصل نسبة ثقافة المجتمع عندهم مستوى الصفر.