تهالا في الكرفطا

العاصمة النخوة و الومشية مقادة و الناس مكارفطة و زربانة كتكول مع راسك جابي الله انا ماشي في بلاد المغرب ،
بعد المرات كنبغي نبدا نقول هالو كيسحب لي راسي في ميونيخ ،
غير تأمل شوية و يابان لك بنادم واحد اخر كيبدل السيفة ديالو ،
ناس الضوء الحمر حالفو بحلفوهم لهما يحترموه و الزبل حلفو في بلصتو لا رماوه،
اوى لاش زعما ديك الهدة زوج كلمات بالفرنسوية وواحدة بالدارجة و ا صاحبي وش غير اجي و كون سيفليزي
و سييييييييييييييير ،
راه الناس ديال بونصواغ و هالو راهوم بناو حضارة و لاو في الشارع يتجاراو و كل حاضي جنابو
و لي عماتو لو يدير الفوضى يخلصها بالثانية و المثنية
اما انت اولد الكابيطال ديال الماروك او موفمون
بول اصاحبي غير في طواليط و قيل عليك الحيوط راك كاع ريبتيهم ،
و المشكلة الساط و ما كتحلى ليه البولة حتى لعلى شي معلمة حضارية
و جمع زنططيك اصاحبي شوية
و كون كنتي غير بانيها بعدا نقولو ما كاين باس
وزيدون كاع باش قودوها مزيان طلاو الحيوط بممنوع البول على الحائط يا حمار...
و الله الى بصح ما كتجيهم البولة حتى لديك ممنوع البول
اوى هادشي بزاف على تحمارييت و خا الحمار غير مظلوم في هاد لافير.
واما المغاربة و لوحان زبل و الله الى خاصها دراسة نفسية ،
نقدر نقول الى فهمنا علاش المغربي كيخلي الطارو حداه و كيلوح الزبل في جنابو
غادي نفاهمو مزيان علاش عندنا حكومة عباس و احزاب بحال الحركة ديال الزايغ احرضان،
ماشي زايغ على المخزن زايغين يديه على اراضي الدولة
و كثر من هادشي كامل غادي يبان بالواضح علاش الانتقال الديموقراطي بغيناه كاملين وحتى واحد ما بغى ينوض يخرج الزنقة ويكول الهرمكة عليه
.اوى بلا فلسفة اسي خاصنا ثورة بولية و زبلية عاد بعدا نفكرو في الكلام الغليض
واهيا بلا ما تبوهل عليا نهار تعلم تبول في دار الوضو وتلوح الزبل في بلاصتو
ديك الساعة اجي دفال عليا الى بقى حكمك شي واحد فحال عببيس ولا شاد بيك الستون شي واحد بحال ولد الرحامنة
اوى ها وجهي هاوجهك اولد الكبيتال
و متنساش تهالا ليا في الكرفطا