بيض الصعو و ارتفاع الاسعار

مع كثرة الكلام على ارتفاع المواد الغذائية ما تغير شي ، وتحس إن المشكلة ( عناد ) كل ما كثر الكلام عن ارتفاع الأسعار زادت الأسعار ، طيب ليش ما تقاطع الناس السلع المرتفعة ، انأ متأكد إن فيه بديل ، ودائما البديل متوفر ، حتى لو مافيه بديل ما اعتقد إن فيه سلعه غذائية تعتبر اساسية ، ماعدا حليب الاطفال، ولو حريم اليومين هذي جيدات كان استغنينا عن الحليب الصناعي ، اما باقي السلع فليش ما نسوي ( كنترول ) يعني مثلا الرز ليش يوميا لازم ( ندقه للحنايا ) خليها مره بالاسبوع والله يخلي المكرونه ( الله يذكرك بالخير ياوزير التجارة ) ، بس انا متأكد ان اغلب الشعب السعودي يقول ( معصي ) ، الحاصل ان دائماهناك بديل نجرب نقاطع السلع المرتفه ، كذلك ليش ما يكون عندنا جمعيات تعاونيه وبطاقات تموين، على الاقل لذوي الدخل المحدود ( ثلثين الشعب دخل محدود ) على طاري الدخل المحدود باكستاني يبغ يروح الدخل المحدود في الرياض وقف راعي ليموزين وقاله صديق) ودي سعودي مسكين ) وعلى فكره الزيادات في الأسعار ماهي من اليوم ، يعني اذكر من زمان في حي العنوز بالرياض ( زمان يافن ) نأخذ نص ريال نشتري فيه قاروة ببسي وبسكوت ( ونرجع الباقي ) فكل شي في زياده وارتفاع ارجع وأقول ان الحل لمكافحة الغلاء المقاطعة ثم الجمعيات التعاونيه وقبل ذلك تنظيم المعيشه وقبلها جميعها التوجه بالدعاء الى الله ، بان يرفع عنا الغلاء فاللهم ارفع عنا الغلاء واللهم يا محيي العظام وهي رميم أحيي لنا حماية المستهلك ، وعلى طاري حماية المستهلك اللي مثل ( بيض الصعو ) كلنا نعرف إنهم على قولة المثل ( نو ذا بدي إن ذا تري ) يعني ما بالحمض احد ، والضرب بالميت حرام ، ولو فيه شمس كان من أمس.