مواضيع اليوم
بمناسبة اليوم العالمي لمكافحة الفقر كتبت
اليوم العالمي لمكافحة الفقر .
يا بوي الفقر مش عيب وما عيب الا العيب , ما عيب إلاّ مال الحرام يملّي الجيب , وربنا وحده العالم بالغيب ,مات عبد الباسط عبد الصمد ما حدا دري عنه ..والملايين مشوا بالجنازة لما مات العندليب ..
يا بوي الفقير لما يموت ما حدا بدري عنه وما حدا ببكيله..والغني لما يموت الكل برقصله وبغنيله ..واللي بنعى بنعى واللي بعزّي بعزّي, وصفحات الجرايد مليانة ولا تسأل عن محطات التّلفزة, ولو كانت اللي ماتتله بسة أو عنزة ....
يا بوي رب العرش أمرنا , الغني يدفع للفقير 2.5 بالمية كل سنة بس إحنا طنّشنا.وعشان هيك ربنا من المطر منعنا
قلبي عليكم يا اولاد الفقير, في عمر الزهور في الورش والمتاجر والمصانع ... وبتبيعوا العلكة والقداحات وليف الجلي في الشوارع .
صارت الساعة ثنتين ....ثلاثة ...أربعة ....وبعدين ؟
احزرو شو صار ؟ أذّن الفجر ...وجفنه ما غمّض أبو جبر ...و ما ذاق طعم النوم من شهر ..كيف ينام صاحب الهمّ والحمل ثقيل على ظهره مثل الصّخر ؟ أي مهو اليوم بمرق عليه وكأنه دهر .
ومرته تقوله اصبر يا ابو فلان , قالها ومنين بدو يجيني صبر ..؟؟
يا حسرتي عليك يا أستاذ ..يا حسرتي عليك يا أستاذ ما ذقت طعم الحياة ....ولو بدنا نحسب عمرك ...بكون عمرك من رحم إمّك للقبر .
رحمة الله عليك يا أستاذ ...تعدّدت الأسباب والموت واحد وإذا ما متت من الفقر رح تموت من القهر .
بتعلم اولاد الناس وبصيروا مدرا وأطبا ومهندسين .واولادك بعد كل هالشقا يطلعوا معلمين .
بس اطمئن يا فقير , الغنى غنى النفس مش غنى الدينار والفلس , والفقراء بدخلوا الجنة قبل الأغنياء
ولغير ربك ما تشكي همك , الشكوى لغير الله مذلّة ,واستعذ بالله من الكفر والفقر ومن عذاب القبر
أضف تعليق
آخر الأخبار من إيلاف
من صوري
فيديوهاتي
التعليقات (0)