بلد الخلع

....تعالي يا بو حلموس نخليك ريس على مصر
....لا يا با هوا انا عبيط؟
....ليه يا بوحلموس
....ياعم رووح ...دا بلد الخلع العام
.....خلع ايه يا بو الحلاميس؟
.....يعني الشعب عرف ازاي يخلع أتخن تخين...الست تخلع جوزها بالقانون ... والشعب لما تكبر في راسه يخلع الريس
.... ما هوا بيخلعه بالقانون الشعبي
....لا ....الريس بالذات بينخلع من غير قانون ولا دياولو
....طب ما انت ها تقعد لك سنة تشوف فيها الهنا؟
....يا عم الله الغني عن الهنا بتاعك
....ها يكلفوك بالأمر
....ها اخلع منهم بصنعة لطافة
....يعني انت موش عايز تبقى ريس؟
....لا...لا....لا...لاه
....يا اخي أقل حاجة هاتروح دار المخلوعين مع مبارك ومرسي
....طب والخناق اللي بينهم كل يوم يعني حاجة مريحة؟
....هما بيتخانقو؟
....كتير بس مبارك لما بيزهق بيروح مركز المخاليع الطبي
....لكن الشعب ممكن يخلعك وانت راجل محترم؟
....الشعب ما بيفكرش ... يدوب أسبوع زمن يقف على الكوبري يخلع العفريت ويقعد يرقص!!
....أظن انت ما تاخدشي ف ايده يومين؟
...آدي انت قلتها بنفسك!!
....طب سلامو عليكو
...ياللا اخلع وعليكو زي ما قلتو