بلادي وأولاد الساده

في بلادي اولاد الساده ساده واولاد العبيد عبيد واولاد الفقراء فقراء واولاد الاغنياء اغنياء وابن الحاكم سيحكم بأمر ابيه وسيظل المحكوم طالع عين ابوة
في بلادي ابن الرئيس يجب ان يكون رئيس وابن الوزير وزير وابن الدكتور دكتور وبنت المهندس مهندسه و ابن الممثل مخرج عظيم او ممثل هايل وابن الغلبان هايعيش ويموت غلبان ابن غلبان
احنا نعرف ان الاراضي والاطيان والاموال والبيوت والعقارات بتتورث لكن ان الموهبه والوظيفه تتورث فدي جديده اختراع خاص وحصري بالانظمه العربيه مش هتلاقيه في اي حته غير في عندنا وادينا بكده ساعدنا في تتطورالفكر البشري وتفوقنا علي الغرب وبنحافظ علي الطبقات الاجتماعيه المختلفه من الزوال او التغيير
ياسلام لو كان ابويا رئيس جمهوريه كان زماني دلوقتي بجهز نفسي للرئاسه وكان زماني بكتب دلوقتي الخطاب اللي هاقوله للشعب عند تنصيبي رئيس (مش قاعد أدون ) وطبعا اي حد هايسالني عن مؤهلاتي هاقول كفايه ان بابي هو الرئيس
ولابلاش اطلع لفوق اوي كده فياسلام لو بابي كان وزير كنت عملت احلي مصالح واحلي شغل وكنت بقيت رجل اعمال والوزاره كانت هاتيجي برده............ او بابي كان دكتور في الجامعه كان زماني دلوقتي معيد في الجامعه اللي شغال فيها بابي وملعون اولاد الناس اللي علي قد حالها هما اساسا ليه يذاكرو ويجتهدو هما هاينسو نفسهم ولا ايه؟؟؟؟؟؟
بقي معقوله ابن العامل ولا الفلاح ولا الموظف البسيط (طبقات فقيره وغير لائقه اجتماعيا) يجنن ويفكر انه يقف جنب ابن البيه الحرامي الكبير لا بن الباشا المرتشي بالملايين وبن الوزير وسياده اللواء والعميد عايز يقف جنبهم في طابور الكليه الحربيه ولا الشرطه داه نسي اصله ولا ايه ؟؟؟؟ طبعا مايصحش وكمان أزاي داه جاي من بقي فقيره ( أصل الفقر بقي عيبه وجنايه ) يعني لو مسك منصب هايسرق علشان يشبع أكيد مش اصله فقير وجعان غير ابن الناس اللي فوق شبعان وعينه مليانه و مش مستني ولا هيبص داه في الاساس مش محتاج الشغل ولا الراتب..داه بيشتغل تضييع وقت ........
ولا اقولك داه بيشتغل خدمه للوطن وللعباد وللناس اللي تحت..............