انجازات حزب وداد

سوأل محوري

وحوار جوهرى

مع مسئول اراندلى

وابن اراندالى

ايه آخر الانجازات؟

وشغل التلت ورقات ؟

آه , زرعنالكم شوية آفات

تزود عليكم الآهات

وياريت تنسوا اللى فات

وماتقولوش خلاص الشعب مات

سيبكوا بقى من الرايحات

وبصوا شوية للجايات

جايبين لكم شوية مبيدات

انما ايه!! كلها سرطانات

وماتقلقوش حجزنالكم فى الحميات

وهانبنى لكم مستشفيات

كلها تلاجات

علشان تكفى الاموات

ودى اول الانجازات

طب وشكاوى الرجالة والستات؟

والصبيان والبنات؟

دى كلها حكايات

وياما بيطلعوا اشاعات

لكن احنا شغالين

وعلى الناس نازلين

بالساطور والسكين

بالضرايب والتأمين

انشاء الله ها نلم الملايين

امال هانجيب منين

والحمد لله رب العالمين

الشعب كله مغفلين

شحاتين وعريانين

وكمان جعانين

عايشين ومبسوطين

وعننا راضيين

وبيشكروا المسئولين

المسئولين الحلوين

الشرفا المخلصين

الافندية المنورين

ياعينى اللى دايما مظلومين

وايه آخر الابتكارات ؟

عملنا محطة مايه

انما ايه!! ميه ميه

علشان الراجل والوليه

والصبى والصبيه

يفتح الحنفية

تنزل مهلبية

ولو عايزها ملوخية

يبقى يستنى شوية

وقريبا مشروع التقلية

والخيبة المستوية

وبيقولوا علينا حرامية

يعرفوا ايه عن الرأسمالية

ولا الديمقراطية

يعرفوا ايه عن الانحطاطية

والتخطيطات العشوائية

ولا القرارات الفردية

هى دى المسئولية

ازاى تزود الآذية

وتبقى ابن مفترية

ولا البلطجية

لايهمك الف ولا مية

ويللا ياابن سعدية

انت و بنت حمدية

ناموا وشدوا البطانية

وماتحلموش بايام جاية.....