انبوبة

 أنبوبة "كلمات نادر الأسيوطي"

يارب وأنت اللي عالم بكل أحوالنا

إفرجها من عندك كتر ياكريم مالنا

إكفينا شر العُوزة حقق لنا سؤلنا

وارزقنا يا كريم بميّه وأنبوبه

في البرلمان قاعدين يشرعوا لينا

علماء وحكماء بيجربوا فينا

هندي وتركي فوق راس أهالينا

بس المهم عايزين بومبه دي النوبة

حياتنا طول عمرها ماشية طوابير

نطلع من بير نقع ف ألف بير وبير

طابور ورا طابور عايشين كما الطراطير

نفسي ف حل سليم وأنا حعلن التوبة

بندفع عشانها فوق التمن أضعاف

دا أحنا غلابة وف الزحام ضعاف

ولو كش فينا جدع نرجع ورا ونخاف

ننزل تحت اللحاف ومنشتريش أنبوبة

هانت حياتي عليّه أكلها ولو حاف

واتغطي بالبرد ولا اتغطاش بلحاف

واعيش عريان وأمشي كمان حاف

و أشوفك يابلدي لمرة مش منهوبة

كلمات "نادر الأسيوطي"