ام واب من بعيد لبعيد

هذا هو حال الكثير من الآباء والأمهات هذا الزمن

أولا يتقدم العريس عن طريق الأهل أو الأقارب أو الأصدقاء ومدام ميسور الحال و هينقل العروسة لمستوي تاني بتعدي حاجات كتير فالمال هو الأهم في أيامنا هذه والعريس ممكن يكتفي بالعروسة مادامت جميله أو شيك أو أهلها الميسورين ويتجاهل الاثنين أهمية معرفة ميولهما أو رغباتهما المشتركة أو ما يحبانه وما يكرهانه وهل سيتفاهمان معا حتي........

ويتم الزواج... العروسه عايزة تتجوز ما هي في ازمة عنوسه والعريس عايز يخلص وميخسرش فلوس الشبكه والمصاريف  ( جوازه والسلام )   وبعد كام شهر تعرف الزوجة انها حامل وتفرح هتبقي أم وفي بعضهم مبيفرحش بتخاف علي جمالها ورشاقتها  والأب مابين سعيد وشايل هم بكرة وبالفعل بيجي الأولاد وتنشغل الأم فالبيت وطلباته وطلبات زوجها وطلبات العيال اللي مبتخلصش ولو كانت ميسورة الحال بتجيب شغاله كما في معظم دول الخليج وانها لمصيبه بتشيل الشغاله البيت من اوله لآخره الأكل والأولاد أكلهم ولبسهم ونظافتهم ومذاكرتهم وحتي لعبهم الذي يمثل للطفل أهم شئ .. فالطفل يتعلم من اللعب ويبني الطفل شخصيته مما يتعلمه من أهله فإذا كان الاهل دورهم غائب فماذا يتعلم ومن من؟ من الشغاله ام من الشارع ام من اصدقائه ؟ فالاب زهقان من الشغل والمصاريف وطفشان من اليبت والام مشغوله مابين البيت واهتمامات اخري والاتنين المهم عندهم الولد كويس بيلبس وبياكل وبيدفعو فلوس المدرسه وخلاص ولا يهتمون بميول الطفل ويشاركوه في يومه ومايمر به من تجارب تعلمه الكثير جدا, وبالتالي ينشأ الطفل وله عالمه الخاص وميوله والتي لايشرك فيها الا اصدقائه الذين يعتبرو له اقرب من اهله فيشاركهم في كل مشاكله وذلك لسبب بسيط جدا ( انهم بيسمعوه ولايعنفوه علي الصغيرة والكبيرة ) ولا يخوفوه ولايضربوه ويكبر الطفل وتكبر خفاياه معه فهو امام اهله ملاك وما خفي كان اعظم وفالاخر نقول الولد ده طالع مش نافع لمين لما نلاقيه بدأ يرد وقلة ادبه تطلع ماهو خلاص ملقاش اللي يقوله عيب ويعلمه بر الوالدين وهو صغير هيتعلمه لوحده لمايكبر؟ طب ازاي  يا آباء وأمهات راعو ربنا في أولادكم وليس كل شيء فلوس لعلهم يكونو سبب في دخولكم الجنه فهم بمثابة عمل صالح ممتد لكم في الدنيا إذا أحسنتم تربيتهم.....

وأخيرا يا آباء وأمهات أولادكم محتاجين عطفكم مش عنفكم ومحتاجين تفاهمكم مش تعصبكم

 ومحتاجين حنيتكم مش شدتكم اهتمو بيهم شوية في صغرهم وفي مراهقتهم وصادقوهم

 واحترمورأيهم ونبهوهم بلين واعتبروهم بمثابة أصدقائكم وهم عند الله صدقة جاريه لكم اذا

 احسنتم تربيتهم