ام للبيع

عن قصه حقيقيه

في يوم من الأيام

يا سادة يا كرام

وما يحلي الكلام

إلا بذكر خير الأنام

عليه الصلاة والسلام

وبعد التحيه بقول

اللي حصل مَهُول

حكايه ليها العجب

فوسعوا لي العقول

حكايه أنا سمعتها

عن أم غاليه وابنها

تعبت كتير عشانه

وهوه شايل فضلها

ربت وتعبت هيه

وقدمت حياتها هديه

لأجل الحبيب الغالي

دا هوه أغلي الذريه

كبر الابن وشب

وأهو صار أجمل شاب

وجه يوم زفافه

وحمدت عليه الرب

أخيرا المولي أمر

و حيتجوز عروسه قمر

قاعدين سوا في الكوشه

لكن حدث أمر مُر

العروسه كارهه الأم

بتقول عليها تُغُم

أنا مش عيزه أمك

إختار ما بينا يا عم

زعق الابن يا ناس

مين يشتري الأساس

أمي أهه للبيع

الأمر مفهوش إلتباس

ما حد نطق بالمره

عاود الابن الكَرّه

أمي للبيع خدوها

محدش نطق بذره

قام الابن وقال

مش حاخد عليها مال

أنا أشتري أمي

بنتك طالق يا خال

وطّي الابن وباسها

انتي يا أمي أساسها

أشيلك جوه عيني

تغور الدنيا بناسها

أبوس التراب والقدم

ونادم أشد الندم

أنتي مفتاح الجنه

والكل لجنابك خدم

شعر نادر الأسيوطي