ام حسن وعطيات امام صندوق الانتخابات !!!

ام حسن : بت ياعطيات لبستى... خلصينا يابت عشان نلحق بدرى قبل الزحمه عطيات : حاضر ياخالتى حالا بس برضع الواد على عشان مايعيطش ويتخمد ينام ام حسن : ياموكوسه ينام ايه هاتى الواد معاكى ده احنا ممكن نقعد ساعات يابت عطيات : ليه ياخالتى ده يادوب فركه كعب نروح نحط صوتنا ونرجع على طول ام حسن : ياهبله المره ده الناس كلها خارجه ورايحه تنتخب عطيات : بلا واكسه ياخالتى ماكنا مستريحين وكان بسلامته الريس مريحنا ولاكنا بننتخب ولا نيله ام حسن : ومين سامعك يامنيله ... الله يرحم ايام سى عز وسى العادلى كانوا باشوات عارفين بحالنا ومقدرين مشاغلنا وبينتخبوا عننا وكانوا بينفعونا فاكره يابت عطيات : فاكره ياخالتى بالاماره آخره مره قبضنا فيها 500 جنيه كل واحده ساعه لما قفلنا صندوق امبابه ولافيه واحده ست من المحجبين دول قدرت تعدى من تحت ايدينا وتدخل اللجنه ام حسن : بس يامدهوله انسى الكلام ده واياك حد يسمعك بتقوليه لايحسبونا من الفلول ويتلموا علينا وتبقى مصيبه !!! عطيات : الا صحيح ياخالت ان مافى حد اتصل بينا عشان نقفله صندوق انتخابات هو جرى ايه الناس مالها ام حسن : انت يابت مش واعيه للى حصل فى البلد الدنيا اتغيرت بعد الثوره والناس بقت ماتخافش وجاتلهم شوطه نزاهه عطيات : اعوذ بالله والشوطه ده ياخالتى تموت والعياذ بالله ربينا يكفينا شرها وده بتعدى ياخالتى ؟ ام حسن : يابت يانت البعبيطه ده مش مرض اللهى اعدمك انت وجوزك الخيبان فى يوم واحد النزاهه يابت يعنى خلاص مفيش تزوير عطيات : ماعلينا ياخالتى طيب احنا هننتخب مين ؟ ام حسن : والنبى يابت مانا عارفه المهم نروح نثبت نفسينا وخلاص عشان الغرامه عطيات : غرامه غرامه ايه ؟ ام حسن : غرامه ياعدمانه لو مرحناش ننتخب هيدفعونا 500 جنيه عطيات : اهو كلام يا خالتى ماطول عمرنا مبننتخبش ومبندفعش ولا جت لينا غرامه ام حسن : يابت الوقت ده غير ده الحكومه مفلسه دلوقتى وعاوزه تلم فلوس وهتجيب منين غير من الغلابه عطيات : حكومه ايه ياخالتى انت مش بتقولى مفيش حكومه ام حسن : يابت الحكومه اللى هتيجى مش هتلاقى حاجه تعملها غير انها تجيب فلوس من الغلابه اللى ذى حالتنا وفضيها سيره ويالله يامدهوله عطيات : ادينا وصلنا ياخالتى هنتخب مين بقى ام حسن : اسمعى يابت انا بحب الموز هختار رمز الموزه والعربيه عشان ربنا يوعدنا عطيات : وانا ياخالتى هختار رمز الكوسه والكرنبه اصل بموت فى المحشى !! ام حسن : طفسه حتى فى الانتخابات يامفجوعه كرنبه ايه مفيش كرنبه فيه قرنبيط عطيات : انا ياخالتى اللى هيقولولى عليه هعمله وخلاص هو يعنى هتفرق كرنب ولا ارنبيط اهو كله طبيخ !! ام حسن : بيقولوا يابت لازم نختار حزب كمان عطيات : انا هختار حزب الناس ام دقون دول باين عليهم طيبين وولاد حلال ام حسن : انت عارفه مين دول يابت عطيات : لا ياخالتى لكن شكلهم انهم بتوع ربنا ننتخبهم وخلاص هو احنا اصلا عارفين حد ام حسن : خلاص شوفى انا كمان هنتخبهم ونفضها سيره المهم علمى وخلصى خلينا نروح بدرى عطيات : انا خلصت ياخالتى علمت خلاص ام حسن : شاطره يافالحه علمتى على ايه عطيات : والنبى مانا عارفه ياخالتى انا لقيت الورقه كبيره وتهت جواها حطيت علامه وخلاص ام حسن : حطتيها فين يابت عطيات : انت هتوجعى راسه ليه ياخالتى مانا الورقه جبتها اهيه معايا خفت ليزوروها فسرقتها وحطتها فى صدرى شفتى بنت اختك شاطره اذاى !!!!! ام حسن : يالهوتى بنت اختى اتجننت !!! ام حسن وعطيات وكثير قوى رايحين ومش عارفين ينتخبوا مين لكن فى النهايه هيه تجربه بحلوها ومرها اكيد افضل من السابق .... واكيد الانتخابات الجايه هتكون افضل وافضل مصر اتغيرت حتى ولو ربع خطوه للامام مادامت للامام مش للخلف ..... ام حسن وعطيات لاول مره يشاركوا فى الانتخابات يمكن لسه معرفوش قيمه صوتهم المره ده لكن اكيد المره الجايه هيقدروا يعرفوا هما جايين ليه وعاوزين يختاروا مين 25 يناير غيرت ام حسن وعطيات ودخلتهم كجى وان ديمقراطيه !!!