الوان حقيقية

الوان حقيقية
ارسمنى ..
بألوان الطيف
شط وخضرة وصياد
ونسمة صيف
اسجنى ف برواز ..
ع الحيط
علشان اصيح ذكرى ..
بعد ما يرحل وش الضيف
ارسمنى بالوان حقيقية
وأوعى الفرشة
ف خطوطى ..
تهوى الزيف
محتاج لحقيقة ..
تكون عكازى ..
وقت حساب السيف
اكتبنى نجاة ..
او مركب غرقان ..
على طرف الشريان
ارسم فيا الانسان
النابت من طين الارض
النايم ع الارض
مش خايف عقرب
او تعبان
ارسمنى ف كل شوارع بلدى ..
النايمة بأمر الحاكم
الناسية امر الله
ارسمنى ..
واوعى الفرشة
ف خطوطى
تهوى الزيف
ارسمنى خريف
افعال
من غير تصريف
ارسمنى .. مش تشريف
الغاز ..
ملهاش تعريف
ارسمنى ..
بالوان الطيف
الوان حقيقية
منتصر سلطان محمد
اسوان – السيل الريفى