الموسيقى والغناء في القصة الشعبية ومثال على ذلك "إجبينه "

الموسيقى والغناء في القصة الشعبية ومثال على ذلك "إجبينه "

اعداد :عوني ظاهر

كيفما سمعتها رايت السرد يختلف واللحن يختلف ولكن النتيجة واحده هناك  كره للظلم وعاطفة مع الحق ومشاكل اجتماعية ينحسر الحديث عنها بالحكاية الشعبية وما اقرب اليوم من الامس فما تهلل له الفضائيات  والصحف ووسائل الاعلام اليوم يصبح كلاما زائفا عندما نكتشف الحقيقة مصادفة ..اليس ذلك عجيبا في زمن كان وما زال عجيبا ...

إن مزج الموسيقى والعاطفة، له قدرة أكبر على التعبير من طريقة السرد لوحدها، ولنتأمل ما قيل من شعر على لسان (اجبينه)، لنرى عواطف (اجبينه) الملتهبة:
يا طيور طايرة يا مية يا سايرة
سلمي ع أمي وبوي وقوليلهم إجبينه راعية
ترعى غنم، ترعى بقر وتقيل تحت الدالية
إنها رسالة (اجبينه) لوالديها شعراً، وبالتأكيد لها أثر أكبر من قولها نثراً أو سرداً..

كان مرّة زلمة ومرته، المرة لا بتحبل ولا بتجيب، أجا زلمة ببيع جبنة ولبنة. شرت المرة منه جبنة وفاتت على بيتها وقالت "يا ربي يا حبيبي! تطعمني بنت بيضة مثل قرص الجبنة واسميها "جبينة" روح يا يوم وتع يا يوم. المره حبلت وخلفت بنت طلعت شلبية وسمتها إمها "جبينة" كبرت البنت وصارت صبيّة. أجا مرّة أمير عندهن وشافها واعجبته. طلب من إم جبينة إنو يتجوزها، قالتله: "أنا بغربش" لكن في النهاية وافق اهلها وكان عندهن خدّامة فطلبوا منها ان ترافقها. لما قرب موعد العرس، ركّبوا "جبينة" على الفرس مزيّنة ومزبّطه، وساقت فيها الخادمة عَ بلد العريس. قبل ما تمشي "جبينة" امها اعطتها خرزة تعلقها بصدرها وقالتلها: "بس تكوني بضيق نادي هي يمّا، بسمعك وبرُد عليك".
مشيت العروس هي والخادمة. بالطريق الخادمة تعبت، قالت "لجبينه": انزلي بدي اركب مطرحك. نادت "جبينه": "هي يما"!. أمها قالت للخادمة:" سوقي ياخادمة!". ساقت الخادمة مسافه كبيرة. ولما تعبت قالت لجبينة :" انزلي بدي أركب مطرحك"، قالت "جبينه": "هي يما بدها تنزلني وتركب مطرحي: قالتلها الام:" سوقي يا خادمة سوقي" .ساقت الخادمة فتعبت وقالت لجبينه:"انزلي تركب مطرحك". نادت أمها- قالتلها بصوت واطي:"سوقي يا خادمة"! ساقت فتعبت . نزلوا يشربوا من بركة المي ولما نزلت جبينة تغسل وجهها وقعت الخرزة منها. ولما مشوا قالت لجبينة:"انزلي بدي أركب مطرحك". صارت جبينه تنادي أمها، معدتش أمها ترد عليها. قالتلها الخادمة:" خلص لا في امك هون ولا إشي". أجت الخادمة نزّلت "جبينه" عن الفرس وركبت مطرحها. بالطريق وصلوا ع ارض مشحره. أجت العبده مرمغت "جبينه" بتراب المشحر السّودة،فتغير لون جبينة. ودهنت الخادمة حالها بالشيد فصارت بيضه مثل "جبينه".
ركبت الخادمة الفرس، و"جبينه" تسوق فيها، توصلوا دار العريس. فاتت واستقبلوها وتجوزت الأمير. قالت الحماة للخادمة اللي عملت حالها عروس: "قومي اشلحي واتغسلي بتتريحي". قالت العروس: "أنا نظيفة وبديش افوت اتغسل.

عيالها عندهن وز وغنم، راحت جبينه على اساس صارت  الخدامة ترعى الوز والغنم بالوعر، وصارت تغني وتقول "يا طيور وطايره، يا وحوش غايره، سلموا ع أمي وأبوي، وقولوا جبينه بالوعر راعيه". تيصير الطيور والوز والغنم والشجر يبكوا معها. صار العريس يلحق "جبينه" عَ الوعر فيشوف شو بتساوي، أجا سمعها لما حكت هيك وعرف انها هي العروس الحقيقية، والخادمة عملت لعبه وضحكت عليها.
روّح العريس عَ الدار وقال لإمو تقول للعروس تفوت تتغسل وتفرفك حالها. فاتت قامت بينت على حقيقتها، وفوتت جبينه تتغسل صارت توج وج. وهيك عرفوا الحقيقة وسجنوا الخادمة و"جبينه" تجوزها الأمير وعاشوا بثبات ونبات وخلفوا بنين وبنات وتوته توه خلصت الحدوثه ...بدنا انعلق ولا لع ؟؟؟

الى القصة فلم غناء وتلحين وسرد بطريقة مختلفه عن ما كتبته اعلاه حيث ثبت المصدر على الفلم  باستخدام الرسوم المتحركة  والحكاية اجبينه