المسافر

الليل ليل ٍ سرمدي والهم يطويني طوي
واللي على موعد نهار السبت ليله ما سرى

وخيول فكري تجتلد شي يعدي شي يهوي
والسيل يا نشّاد قد لحق الثرى يم الثرى

الله واكبر في زمان المال ما تلقى خوي
كل ٍ يحوش النار لقريصه وجاره ما طرى

يا ساري ( ن ) جرد الفيافي قربتك تبغي روي
والبير يحتاج لدلو وحبال ورجال وعرى

والدرب متعرج وذيبان الفلا تعوي عوي
والنقص ياكل مزهبك والخرج ولى وانهرى

يالله دخيلك ما يسير بدرب ظلما مهتوي
لكنّ من حده زمانه ما يحسّب في كرى

وبتالي الرحله على الدرب الطويل الملتوي
لقا صحيب ٍ يسأله وش فيه جرحك ما برى

وقّف يمينه والتفت يمّه وقال أنت الخوي
بنشدك عن داري بعد ما رحت وش فيها جرى

قال الرفيق الا طلبتك حاجه وصف النوي
عن قصة الثوب المرقّع ليه شقه من ورى

جاوب خويي يا صحيب السجن لو يزوي زوي
أحب من فتنه بعدها وش يجي ما يندرى

ياكود ليل ٍ سرمدي وهموم تطويني طوي
واقف على موعد بتال الدرب باطراف القرى