المالكي وعلاقته بالرقم اربعة !!

 

رئيس الجمهورية مام جلال (الله يشفيه) مريض يتعالج في المانيا وقبل ان يموت المله خضير گام يعدل بشواربه ويتنحنح ، ونذر يذبح سبع بقرات سمان اذا الله سهّل واخذ امانته. حتى يصير خضير اول مله بالتاريخ رئيس جمهورية !! وغير المله خضير هواي ناس گامت تحلم وكل يوم حچي شكل .. ناس گالوا علاوي يصير بمكانه وناس گالوا حرم مام جلال اولى تصير بمكانه وناس گالوا النجيفي !! هذا كله والفريق الطبي يومية يحلفون مية يمين ان مام جلال جاي يتحسن وحالته مستقرة !!

ما علينة .. نرجع لسالفتنه !! وين وصلنه ؟ خلصنة مام جلال ومله خضير هسه نجي على ابو زياد طارق الهاشمي نائب رئيس الجمهورية الثاني مع وقف التنفيذ !! متهم بالارهاب وهارب ومحكوم خمس اعدامات وربع !! كما يقول قضاء ابو اسراء العادل جداً !! ويمكن راح يلحكه فد خمس اعدامات منا للانتخابات الجاية !! زين هذا خلص منو وراه ؟ 

اها تذكرت صالح المطلگ بعثي مجتث ورجع للحكومة بالشافعات والف يا علي حتى صار نائب رئيس وزراء لابو اسراء ؟! وباقي بهذا المنصب بمزاج المالكي ويوم اللي يزعل عليه يمنعه يدخل لمكتبه ولمجلس الوزراء الى ان يعتذر ويعلن التوبة !!

اما اخونه وزير المالية رافع العيساوي فهو الى الان قريب من دائرة الشبهات وحمايته كلهم ارهابيين !! واذا يجر عدل ويصير حباب نغلس ونسد الموضوع .. واذا ما يكعد راحة تره ابو اسراء يدري بي چان الطبيب الخاص للزرقاوي وعنده ميليشيات ومتعاون مع تنظيم القاعدة وجماعته بالحزب الاسلامي قتلوا العشرات من اهل الانبار !!

زين هسه نسيتونا البعثي المحنك علاوي مو مشكلة بس شلون ترهم نترك كاكا مسعود رئيس اقليم كردستان هذا الانفصالي الديكتاتور اللي مايريد الخير للعراق ويزور جبهات القتال عيني عينك!!  ويتحدى ابو اسراء ؟! بالله عليكم يصير ؟!!

زين حتى لا تكولون ابو اسراء طائفي وشوفيني. خل نفرها على جماعته بالتحالف .. سيد مقتدى الصدر متهم بقضية عبد المجيد الخوئي وجماعته كلهم ميليشيات ويقتلون بالناس وابو اسراء ساكت حتى لا يشق صف الشيعة !! وبهاء الاعرجي اكبر حاقد عالمالكي ومتهم بقضية البنك المركزي. وصباح الساعدي بعثي يمارس التقية وفاسد ويريد يغطي على فساده بمهاجمته للمالكي .. ولا تنسّوني الرفيقة مها الدوري .. هذي اكبر حاقدة وما عندها شغل وعمل غير گال المالكي وحچه علي الدباغ ؟! طبعاً بعثية بت بعثي !! 

زين منو بعد ؟ اها السيد عادل عبد المهدي همين متهم بقضية بنك الزوية وجماعته هربهم لايران ؟!! ولو السيد استقال وترك منافسة المالكي بس مع ذلك ضروري نتذكر خاف يغير رأيه باچر عگبة  وينافس ابو اسراء !! 

اما اعضاء البرلمان فكل اعضاء العراقية بعثيين وارهابيين بالنهار وي الحكومة وبالليل يصنعون مفخخات ويزرعون عبوات بالشوارع !! حتى حيدر الملا .. تصوروا يطلع بالليل يزرع عبوات وهو بعمان ؟! حتى مرة شافته مريم الريس وما گدر يشرد منها وگللها استري عليه الله يستر عليج !!

والقائمة طويلة وماتخلص لا بالچلبي ولا بظافر العاني ومحمد الدايني ومشعان الجبوري والجنابي ووووو !!

زين بشرفكم مو الله يساعد گلب ابو اسراء ؟!! منين ما يدور وجهة بعثيين وقتلة وارهابيين وصداميين وشيعة متآمرين علي وعالدعوة وعالدولة ؟! وكل هذا والسبع طالع منها وساد احلوگهم كلهم. بس واحد يطلع راسه يطلعله ورقة زغيرونه مكتوب بيها رقم (اربعة ) والعاقل يفتهم !!

لحظة .. لحظة .. بشرفكم اذا الدولة كلها هيج .. هاي هم تنحسب دولة ؟!! 

زين اذا احنا من تسع سنين يقودنا ارهابيين وصداميين وقتلة وفاسدين. ليش ما ننتفض ونجمعهم بزنزانة وحدة ونخلص منهم كلهم فد مرة !! وما يبقى بس ابو اسراء الله يحفظه بالساحة !! هو الرئيس وهو رئيس الوزراء والقائد العام للقوات المسلحة وكافي يساعده عزة الشاهبندر ومريم الريس والعسكري وعباس الوسخ !! وما ينقص الحكومة الا چذاب رسمي بمكان علي الدباغ !! وهواي ناس بالبلد حاضرين لهذي المهمة طبعاً !!

بالله عليكم مو هيچ احسن مما كل يوم هزي رطب يا نخلة ؟! 

ولعيون ابو اسراء .. غمض عيونك .. تره الرجال حلف بالعباس ما ينطيها !! لا