سألنى مراد الزفر وأنا بشترى سمك.. هو ايه اللى بيحصل فى البلد ياباشا.. فقلت له عقب ثورة 25 يناير سقط النظام وبالتالي يسقط الدستور كاملا ويجب ان يحل محله دستور جديد وليس تعديل جزئي له، لكن ما حدث أصبح مزيج مابين القانونى وغير القانوني أو الدستورى وغير الدستورى.. فقاطعنى الزفر قائلا مش فاهم ياعم يعنى إيه.. فقلت له يعنى ببساطه الشعب المصري اشترى حريته بس نسي ياخد الكتالوج و نازل لعب في كل الزرارير والنتيجة عشوائية وتخبط سياسي وشعبي ترتب عليه مانعانيه اليوم، فقال لى مراد الزفر.. طيب والحل يا هندسه.. وقبل أن اجيب قالى بس وحياة أبوك ماتقولى الكلام الكبير اللى مابفهموش ده.. فقلت له الحل يا مراد أن يزاح تماما كل من كان فى السلطة قبل 25 يناير بما فيهم المجلس العسكرى لأنهم عاجزون عن الفهم ومشكوك فى نواياهم ومساعيهم.. ويحل محلهم مجلس تأسيسي شعبي لإدارة البلاد بمعاونة مجلس الوزراء الحالى أو حكومة تسيير الأعمال.. وأن يكون هذا المجلس مكون من خبراء فى القانون الدستورى.. وأن يتم انتخاب مجلس الشعب بشكل فورى وطبقا لضوابط منطقية تسمح بتكافؤ الفرص.. وانتهينا على كده.. وقولت لمراد فهمت حاجه.. فقالى اه طبعا.. الشعب بيلعب فى الزراير بجهل ولخبط البروجرام .. صح؟!!
التعليقات (0)