الطاهرة

قصيدة عامية الطاهرة

جاى
اغسل ف غديرك همى
و أسيبلك نفسى ..
يا أغلى من روحى ودمى
يا ابويا و اخويا ..
وأمى وعمى
مين غيرك .. حيطبطب ويسمى
جاى ..
اغسل ف غديرك همى
واحكيلك اسرارى وتبتسمى
وان قلت الاه ..
الاقيكى من المى بتتقسمى
وان طلت ضحكة ف وشى ..
الاقيكى العجبانة بتبتسمى
وتنادى وتقولى نصير
مليون مرة اسمع اسمى
واما اسأل سر المنادية ..
تقوليلى .. بتدوقى حلاوة اسمى
جاى ..
اغسل ف غديرك همى
علشان ارجع من تانى صغير
وارجع لحيانتا الاولى
ارجع لحياة الطير
ادفى بحنانك ..
لو كنا ف عز امشير
واسمع منك حدونة
واسافر واطير
وفجأة القانى شبه الغصافير
وانت عصفورة الجنة
يا هبة الله
الدنيا بدونك ايه .. ؟
وبدونك ايه معنى الخير .. ؟
جاى ..
اغسل ف غديرك همى
و اتوضى واصلى ..
واضحك الضحكة واعلى
تسمعى ضحكى وتجلى
ويبان النور
على هيئة عصفور
والارض تبطل دوران
تخجل وتخاف ..
لا تضايق ست الحور
والسما تخجل حتى تمطر ..
لا تبل الجنة .. تحت اقدامك
يا طاهرة يا امى ..
جاى ..
ابوس اليد وابوس الخد..
وراوية معايا ..
تقولى كفاية يا ود
سيبلى شوية ..
اعيش ف الدنيا اللى بجد
منتصر سلطان محمد
اسوان السيل الريفى
Monty_sol@yahoo.com