الشئ اللى يزيد عن حدو ينقلب لضدو

الشئ اللى يزيد عن حدو ينقلب لضدو
احب افهم بس ليه الناس معتصمة دلوقت فى التحرير؟؟
احب افهم هل مش من حق الجيش اللى دافع عن الثورة وحماها انه يحفظ امن البلد؟؟
واحب افهم هل من الحكمة الآن نقد الجيش او تظاهر ضباط من الجيش؟؟
واضح ان بتوع لا مبيعرفوش غير الكلمة دى وبيرفضو كل شئ لمجرد الرفض (خلقت لاعترض).
الجيش يعمل ايه علشان يثبت لسيادتكم انه هينفذ طلباتكم؟؟ والمفروض كان يعمل ايه اكثر من كده؟؟
كلام انه بطئ ده كلام عيال لان عش الافاعى يجب الدخول ليه بحذر ,وكلام انه هو كمان كان فيه فساد ,اه معروف ان كل البلد كان فيها فساد بس يغفر له كل الفساد انه انقذ البلد من كارثة وبدل كلمة شكراً عمالين يشككوا فيه.
دلوقت الجيش عليه مسئوليه كبيرة وبدل ما بنساعدو بنضرب فيه.
حسبى الله ونعم الوكيل فيكم ياللى عايزين تخربوا البلد بجد.
شباب الثورة برئ منكم ومن افعالكم,عمالين تنساقوا زى البهايم من غير تفكير ورا الثورة المضادة بدون وعى ومش عارفين ان اسرائيل بضربها للسودان كانت بتوجه لينا رساله انها ممكن توصل لاسوان,وبدل مانلم الدور ونركز بنشغل جيشنا العظيم بهبل وعبط.
على فكرة لو الجيش كان ضرب فى الناس يبقى عنده حق,واللى بيقول مينفعش يضرب زى اللى بيقول القاتل ميعدمش,
ياساده عقوبة المفسد فى الار ض الاعدام ,كفايه بقا وارحمونا وعلى فكرة انا بدأت اصدق ان فى جهات بتحركوا .
قوى مصر الوطنية المعروفة مثل جمعيه التغيير وحركة كفاية والاخوان بريئة من افعالكم.
وانا مع ان الجيش يعتقل كل خارج عن القانون ومثير للفتنه,انا كنت هناك فى التحرير يوم الجمعه وحسيت ان الميدان سمك لبن تمر هندى وكان فى منصات غريبة واشكال غربية مش ممكن يكونوا من شباب الثورة.
واتمنى من كل القوى الوطنية تتحد بقوة مع الجيش للقضاء على هذه الفتن واننا نثق شوية فى الجيش ونديلوا فرصة يتصرف براحته ولا نملى عليه اى شروط ويكفى فضل الله علينا اننا فى 18 يوم حققنا النتايج دى شوفوا ليبيا عامله ايه واتقوا الله .
ياريت نسيب الجيش ومجلس الوزراء الشريف يعمل ونحاول احنا نعمل لاصلاح البلد من خلال التطوع والتعاون مع جمعيات المجتمع المدنى لان دى مرحلة البناء وبدل ماندور على فلوس مسروقة نشتغل احنا وننتج وهنجيب اضعاف الفلوس دى ان شاء الله ,هى دى الايجابيه .
ونتذكر كلام الشيخ الشعراوى عن الثائر الحق,ولا ندع الشيطان يحيد بنا عن اهداف الثورة والاصلاح والا مافائدة الثورة لو لم نعمل ونصلح ونجعل مصر فى اعلى مكانه؟
مجرد مخالفة الناس فى التحرير لاوامر الجيش يعطى الجيش الحق فى ضربهم .
كفايه هرجله فى كل شئ وعشوائية,حتى الجهاد ضد الظلم يجب ان يكون بنظام وعدم عشوائية.
ومكنش ابدا من الحكمه الوقفه عند السفارة الاسرائيلية فى الوقت ده,هو فى ايه الجيش مش قادر علىكم ولا ايه؟؟
اتقوا الله وفكروا فى نتيجة اى حاجة بتعملوها,دى مرحلة العمل علشان نقدر نواجه اى عدو يجب ان نكون اقوياء ,كما قال تعالى (واعدوا لهم ما استطعم من قوة) كل شئ بنظام وتخطيط ودراسة وهدف ,الموضوع كده زاد عن حده وهيضرنا كلنا وهيتنفذ طاقة البلد فى اشياء هامشية ارحمونا لو بتحبوا مصر.
ادعوا مثلا من يسمون السلفيين ان ينزلوا وينتشروا بين الناس ويأمروهم بالمعروف ,من عدم القاء قمامة واحترام المرور والنظام والعمل,هو ده المعروف اللى نعرفه فى ديننا (اعطوا الطريق حقها)مش نقعد نهبل ونكلم فى كلام لا يودى ولا يجيب.
وكل واحد عمل الثورة يخاف عليها ويحاول يصلح المجتمع مش يقول مفيش فايدة.
احنا خلصنا الجهاد الاصغر وبدأنا الجهاد الاكبر اللى هو بناء مجتمع صالح.
جمعية رسالة مثلا بتنظف الشوارع وتسد الحفر والمطبات ,يارت تفكروا فى حاجة ايجابيه لان البلد بايظه ومحتاجه لطاقتكم دى فى العمل والاصلاح مش الفساد والفتنه.
اعداء مصر عايزينها تفضل فى فوضى ومتنتجش وتفضل ضعيفه ومتأخرة.
انا قلت كلامى لوجه الله ورزقى على الله واللى بيحب مصر بجد يبدأ يشتغل لان ديننا علمنا كده (اذا قامت الساعة وفى يد احدكم فسيله فليغرسها).