السلسال

صوت الرياح اللي طوى نازح البيد
طـي الأديـب الألمعـي لكتابـه
خلى الشتا يشعل شجون المواقيـد
كن الحطب للنـار يعـزف ربابـه
وانا معك صدري من العيد للعيـد
كم شب به جمر الغضى وانطفى به
تضحك ويثمر في شفاهي عناقيـد
وتبكي ويورق في عيوني كا ّبـه
واضماك وتشح بك عذب المواريد
واستسقي وصالك وتكذب سحابه!
واتبع سراب الحلم من دون تحديد
وتكذب مواعيده ويصـدق سرابـه
صرت الغني وراس مالي مواعيـد
تراكمت طول الزمن في حسابـه!
والضيقة اللي ضيقت شيخة الغيـد
وش لون في صدري تدور رحابه
با الهون يا عليا على قلب ابو زيد
كم هم غيرك مر به ما درى بـه
يا ليت للفرحـة شهـادة مواليـد
وادعي لك بها ساعة الاستجابـة!
حملتي السلسـال حـر التناهيـد
لو هو ذهب حر التناهيـد اذابـه
خليه يلعب من ربى النحر للجيـد
لو فاض شلال الشعر والتوى بـه
مثلي هو السلسال ما يقبل القيـد
لاجي لقى منفى جميل ورضى به!
وقولي لرواح المطر يغسل البيـد
لاطفى الشتا نيرانه وصـك بابـه