السر المباح في أقوال خلف الدواح !!

منذ افتضاح أمر قضيه زير النساء الحوزوي السيد ( مناف الناجي ) والتجائه لبراني السيد , فلقد صاحب ذلك الالتجاء أختفاء خلف الدواح عن دائرة الضوء بعد أن كان محط أنظار الجميع حتى أن البعض ربط مابين افتضاح أمر الناجي واختفاء الدواح , لأن الأخير قد ظهر في احد أفلام ( الناجي ) التربوية التي تم تسريبها عبر موقع اليوتيب وقد ظهر فيه وهو يحاول أصلاح لباسه الداخلي وفيها بانت عورته وكأنها عورة البعض من ساسة أحزاب الإسلام السياسي يوم إعلان النتائج الأخيرة للانتخابات البرلمانية !!
بل إن البعض راح يبالغ في أسباب اختفاء خلف الدواح حين ادعوا إن سبب اختفائه هو تسببه في التلوث الذي أحدثه انفجار بئر خليج المكسيك !!
وعندما حاولت ألاتصاله به عبر رقم موبايله ذو المهمات الخاصة أجابني باكيا :
_ مروتك سيدنة .... تره مناف الناجي ورطني بهذي القضية .... وتدري آني( سلمان باك ) ورافع شعار للبول فقط ...... وروح السيد تره الطالع بالفلم مو آني هذا واحد يشبهني وتدري بيه آني ما ألبس لباس من الله خلقني !
و فوكاه مطلّعيني لابس لباس كساسي !!
فأجبته محذرا اياه :
_ ولك خلف تره قضيتك داجّة . وعشاير واعيان العماره هدرو دمك !
فأجاب متوسلا :
_ سيدنه الله ينتقم منك يا بو العرك ..... ردتك عون طلعتلي فرعون ..... جا حسنه تزني وخلف الدواح ينجتل ..... وفوكاهه مناف الناجي كاعد بأحضان المرجعيه ومستمتع بالبخيخ وآني هايم على وجهي مثل خروف فاتحه .... هاي هيه عدالتك يبو خيمة الزركه .... من تفو على حظي الاغبر ؟
بعدها انقطعت اخباره بشكل تام . غير ان رسالة SMS وصلتني من مجهول تفيد بأن خلف الدواح سيظهر بعد قليل على قناة ( ابو لؤلؤء ) الفضائية !!
فتيقنت تماما ان خلف الدواح تم القاء القبض عليه هو وصاحبه مناف الناجي وسيظهران حتما على الشاشة للإدلاء باعترافاتهم بالرغم من قناعتي ان الاخير ينعم بالأمن والأمان وهو في براني السيد !
تناولت الريمونت وراحت أنامل أصابعي تعبث به بحثا عن قناة ( ابو لؤلؤء ) والتي لم يسبق لي إن شاهدتها لأن مغرم بقناتي الوصل وصفا وبقنوت القمر آموس !!
بغتة.... ظهر خلف الدواح على شاشة التلفزيون وهو يعتمر عمامة سوداء ملفتة للنظر كونها كبيرة الحجم وتميل نحو الخلف قليل وقد برزت خصلة من شعره رأسه الكستناني وهي تغطي جزءا من جبهته ومرتديا جبة سوداء فيما راحت إحدى المذيعات وهي تقدمه لجمهور المشاهدين قائله :
( سيداتي سادتي .... وكما عودتكم شاشة قناتكم المفضلة وهي تطل عليكم من خلال قناة الأسرة العراقية بتقديم بما هو جديد وممتع ومفيد واليوم ومن خلال الدورة الجديدة لقناتكم الماسية نلتقي بكم و برنامجنا الجديد ( دروب الدجل ) حيث نستضيف في مثل هذه الساعة ومن كل أسبوع الخبير في علوم البايروسوكولجي وقراءة الطالع والفنجان والخبير بالتداوي بواسطة الأحجية والأدعيّة المجربة , انه البروفسور وصاحب الكرامات المعروفة حجة الإسلام والمسلمين والإمام الرباني السيد خلف الدواح الحسيني الموسوي المشهداني الكر بلائي والملّقب بابو علي ألشيشاني عزم مقامه ..... وضيفنا العزيز غني عن التعريف فهو عضو الجمعية الوطنية البنغالية والعضو السابق في البرلمان الهندي والحاصل على شهادة الدكتوراه من جامعة طهران في حب الولي الفقيه والحاصل على شهادة البورد العالي في علوم الدجل والضحك على الذقون وشهادة الدبلوم من جامعة ( تيسي فيسي ) في علوم فك الطلاسم وعقدة اللسان والمحاضر في جامعة ( هبياض ) في ولاية البنجاب الهندية والخبير القانوني لشركة ( نفايات ) لطباعة الادعيه والحروز والبازبند والأستاذ التدريس في جامعة ( الصحابي الجليل أبو لؤلؤه ) في علوم ( الضرب بالتخت رمل وقراءة الكف وباطن القدم والعلوم الميتافيزقيه ) .
وضيفنا الكريم سيرد على أسئلتكم واستفساراتكم في كافة العلوم الغيبية , وسوف نتلقى اتصالاتكم عن طريق الرسائل النصية SMS او عبر أرقام الموبايل الظاهرة أسفل الشاشة وهي صفر صفر مكعب صفر مكرر صفر اسياسيل والرقم صفر صفر مكرر صفر مكعب صفر زين العراق . فاصلا ثم نعود !!
لقد أثارني ظهور خلف الدواح المفاجئ على شاشة التلفزيون شيئان أولهما مظهره ولباسه الغريب وادعائه بأن من سلالة أهل البيت وأهل البيت منه براء وأنا أولهم !!
وثانيهما ادعائه بكونه خبيرا في كل المعارف والتي ذكرتها مذيعة التلفزيون علما ان خلف الدواح لم ينه دراسة الابتدائية وهو شبه أمي غير انه لبقا ومتفوها ويمتلك كارزمه قل مثيلها !!
عادت المذيعة للظهور مرة أخرى بعد فاصل دعائي وهي تتلقى الاتصالات من المشاهدين !
المذيعة _ الو ... الو ... منو وياي .... اخي شويه ارفع صوتك ونزل صوت التلفاز ... تفضل اخويه أسئل سماحة السيد .
المتصل _ آني ابو اسراء المالكي من المنطقة الخضراء !
المذيعة _ أخي اطرح سؤالك على السيد بشكل مباشر وبسرعة رجاءا !!
المتصل _ سيدنه الجليل ..... تدري آني رئيس الوزراء الآن وفزت بالانتخابات الأخيرة بأعلى الأصوات لكن مع كل الأسف حلفائي الشيعة يرفضون إعادة انتخابي مرة ثانيه وأريدك تكتبي فرد دعه لو عوده تلّين كلب السيد الزغّير لآن بصراحة تعلمت على منصب رئيس الوزراء وبعد ما اكدر أعيش بدونه . وآني على استعداد للتنازل عن كافة صلاحيات المنصب ما عدى الكرسي ... مروتك سيدنه شوفلي جاره ... وشتطلب آني الممنون !!
خلف الدواح _ شنهي سالفتك ابو اسراء جا نسيت ( من اجيتك بليله سوده من جنت تبيع السبحّ .... طلبت منك ألف ليره كتلي أكلب يا جدع !!) من جنت بالسيده زينب .... ورديت علّيه وكلتلي روح الله يطّيك قابل آني أمفتح بنك للخلفوك .... روح يم جماعة الحكيم عدهم افلوس اهواي .... أتذكرت لو لا !!
على أي حال دواك يمي ..... لكن هذا الدوه يكلفك غالي وهذا الدوه استخدموه من قبلك معظم الدكتاتوريين امثال الرئيس شاوسسكو ومولوسفش وعيدي امين و بوكاسا وهذوله نامو على كرسي الرئاسه نومة اهل الكهف الى ان جرهم الشعب بالشوارع .... شنو رأيك حبيبي ابو اسراء ؟
المتصل _ سيدنه متهمني النهاية أهم شي هو التجديد لأربعة سنوات قادمة وبعدها خل تنكلب الدنيه ويحترك العراق ... أهم شىء أريدك تفك جبسة المنصب بعد ما اتحمل صبر ..... وراح شوّف شراح نلعب شاطي باطي بالعراقيين آني والمستشارين وراح تجيك الاخبار شراح ادك بالصدريين دكة خزعلية على وكفتهم هاذي وشراح يشوفون من صولات وصولات اما انته فراح اجازيك بمنصب رفيع المستوى بعون الله وأعيّنك مستشار بدلا ابو ادريس !!
خلف الدواح _ زين عندك ورقه وقلم ؟
المتصل _ نعم مولاي
خلف الدواح _ جا اكتب يحسين !
ربع كيلو جاي الحصة التموينيه بشرط ان يكون مطّعما ببرادة الحديد قصدي من نفس الطلبيه اللي استوردها ابو ادريس ثانيا ربع كيلو حليب مطّعم بالميلامين الصيني ومن نفس الطلبيه اللي استوردها ابو رحاب وتجيب اربع بيضات من بيض اللّكلك وبطلين من مي الحضره المقدس وكوم اخبطهن زين بليلة سوده وهندس وخليهن على نار تنور طين الى ان يفورن بعدها تشربه على الريك وتاكلك حلانة تمر دكلّ وتنام على ظهرك جوه شمس تموز خمس دقائق واذا اتحملت الحراره وبقيت عايش وما متت من الحر تعال اتفل بلحيتي !!
المتصل _ هاي هيه الوصفه سيدنه ؟
خلف الدواح _ جا شترد بعد ... قابل اطلب منك تسد بئر خليج المكسيك ؟!
المتصل _ والله اسويها لو المنصب مضمون !! ( انقطع الاتصال )

المذيعة _ عدنه اتصال آخر ..... ألو من حضرتك ..... أهلا بيكم شيخنا العزيز جلال الدين الصغير ...... وياك على الخط السيد خلف الدواح
خلف الدواح_ هلو حبي جلاّوي ... وينك .... اشو لا خبر لا جفيه لا حامض حلو لا مركز ؟؟!!
المتصل _ أي والله يا سيدنه ... لا مركز ولا منصب ... هذا حظنة الاسود .... ما دام السيد سرحنه بالكنافذ وذبنه على منطقة الحكم الذاتي بالانتخابات الماضيه وطلعت النتيجه هبياض لا من وره ولا من كدام ...... وهذا جزانه على كل سنين نضالنه من جنه بالمعارضه .... وفوك كل ضيم الله محد ذكرنه لا بالمقاعد التعويضيه ولا بمناقشات الكتل الفائزة !!
خلف الدواح _ عمي احمد ربك ..... موزين ما اخذ منك السيد مسلخ براثا وحوّله الى قبر ثاني لشهيد المحراب .... جان وين أنطيت وجهك ..... على أي حال شنهي مشكلتك ؟
المتصل _ سيدنه كل هذا وتكلي شني مشكلتك اريد منصب وزاري ..... حتى لو وزارة الداخليه !
خلف الدواح _ شنهي سالفك جلاوي .... اخاف تريد تكملة مسيره بن صولاغ بملجئ الجادريه .... ليش ما شبعت من مسلخ براثا ؟
على أي حال أكتب يجلاوي !
اشتري بطيخه حلوه وازرفه زرف جبير ( المتصل مقاطعا )
المتصل _ سيدنه كلشي الجان ولا شغلة البطيخه الحلوه .... جربتها وسوتلي مشاكل صحيه .... شوفلي غير وصفة رحمة للعزيز الكريم !
خلف الدواح _ اذا وصفة البطيخه مافادتك جا مالك جاره ... احسن شي ابقه كاعد بمسلخ براثا قبل ما يسرحوك بلكنافذ مره ثانيه !!
المتصل _ سيدنه .... مروتك .... سيدنه ( انقطع الاتصال )
المذيعه _ اتصال آخر ..... ألو .... منو ؟
المتصل _ العفو ممكن أسئل السيد ؟
المذيعه _ أخي قدم اسمك والسيد وياك على الخط .
خلف الدواح _ عمي أحجي شبيك جنك عدنان الدليمي توجوج ؟
المتصل _ العفو مولاي آني البرلمانيه مهى الدوري .!!
خلف الدواح _ هلو حبي مهاوي ... يابعد بيتي وطوايفي ... صدقة للحجاب وهذا الوجهه القمري الايماني !
المذيعه _ ( مستدركه ) مولانه تره احنه على الهواء بشكل مباشر
خلف الدواح _ ( مقاطعا ) خالي قابل احنه شكلّنه .... قابل سبينه العنب الاسود .... ان الله جميل ويحب الجمال !
المتصلّه _ عيني انتي المذيعه شدعوه محترك كلبج .... خلي السيد يحجي براحته .... سيدنه صدقه لعمامتك الحلوه ووجهك الباسم ..... تروحلك فدوه كل الّعوبات والعوانس و المذيعات !!
خلف الدواح _ عمي مهاوي لا تتعاركن كلجنً حلوات أنتن الزينبيات .... ما ريد مشاكل أروحلجن ً فدوه من فوك ليجّو .... تفضلي أسئلي !
المتصله _ سيدنه اكو منطاد للأحتلال الأمريكي صاير فوك بيتنه بمدينة الصدر وبيه كامرات مراقبه .... وآني مرات اصعد فوك السطح بدون حجاب واخاف يصورني وينشرون الصور على اليوتيب مثل ما صارت بشغلة مناف الناجي .... واريد منك تسويلي كلاو الخناس !!
خلف الدواح _ شتكولين يا بعد شيبي ..... منطاد مال احتلال أمريكي فوك السطح .... جا انتي لو ما الاحتلال الامريكي احد يعرفج لو يشتريج بزبانه ..... من نعلتله على بو خيرجّن ويا بو الاحتلال من جاب هجّ شكولات .... ولجنّ اسكتنّ لومو الاحتلال جان كتلجنّ الوسخ والكّمل والنعوسة !!
المتصلة _ أنزول على كلبك سيدنه ... انته شكد قاسي ... عيوني سيدنه سويّلي جاره مو الحجي ميخليني اصعد للسطح حتى اعيش تجربة حر تموز وانقل تلك المعانات لأعضاء البرلمان القادم حتى يلّكون حل لمشكلة الكهرباء بسنة 2014 !!
خلف الدواح _ اذا جان الموضوع نقل معانات المواطنين ... جا أكتبي
اولا تكتبين جملة عين الحاسود بيه عود 555 مره على جناح فراشه ذكر ... بعدين تخلّّينً الاجنحه والحواصل مالت الفراشه ببطل مال تراوبي .... وتشدين هذا البطل على سهم ..... بعدها تشمرين هذا السهم ابو البّطل على المنطاد ..... المنطاد راح يخاف من سهم عيونج ويتخربط وينفجر .... وبعدها راح تنامين على السطح براحتك و بطرك العباء انتي والحجي !!
المتصله _ أوكي مستر ماي لوف !!
خلف الدواح _ عيني مها عودّ وديلي رقم الموبايل على الفيسبك !
المذيعه _ اتصال آخر .... اهلا ومرحبا .... تفضل منو حضرتك ؟
المتصل _ وياكم الشيخ حميد الهايس من شيوخ الصحوات !
خلف الدواح _ هلو حميدو ..... اشو انكطعت اخبارك شيخنه ... لا تصريحات ..... لا تهديدات ؟
المتصل _ والله سيدنه تورطنه وصرنا في احضان الأئتلاف .... لو سامعين نصيتك وبطلّنا سياسه أهواي احسلنّه .... وتدري مولانه أحنه مو مال سياسه .... احنه اسدادية بالأنس والطرب فقط وحصريا ..... لكن السيد قشمرنه وكال الكم انتم السنه العرب كرسي مظمون بالبرلمان القادم .... وهسه احنه ينطبق علينا بيت الشعر القائل ( يا سيد خلف ماتت معّلايه .... لا هيّ أبداره ولا هيّ بالولايه ) على اي حال مولانه اريدلي فرد بازبند ضد الرصاص و العبوات اللأصقه وقنابر الهاون ومصايب الساده لأن جماعة القاعده اخذونه وخيذه ... يوميه طاكين واحد بالدهن من قادة الصحوات !!
خلف الدواح _ والله شيخه .... تره شغلتكم انتم اهل الصحوات لاكفه تراب ... وآني أشوف لو تعلنون توبتكم وترجون احباب كلب على كلب ويه القاعده وتخلصون من تحالفاتكم الغير مدروسه ويه احزاب الاسلام السياسي ... ادري انته اشجابك ويا الأحزاب الطائفيه .. كجا .. مرحبة .... ثانيا أنته شوداك لقبر خميني ..... مو هذا بركبته دم مليون مواطن عراقي ..... نسيت شيخنه !!
بس لا تكلي الهم الوطني جمعني وياهم .... تره هذه القوانه سامعيه أهواي .. على اي حال أكتب يحميّد الوصفة .... تاخذ بطل حليب اسباع عراقي وتخبطه ويا قوطيتين بيره اسلاميه ايرانيه الصنع وبعدين تفورهن لمدة 72 ساعه وتشربهن على الريك وانته تغني ( انسى الدنيا وريح بالك .... وواعا تفكر بلي جرالك ) بعده تاخذلك غفوه بأحضان الحبايب والله كريم .... يمكن تصيب ويمكن تخيب والستر من رب العالمين !!
المتصل _ بسيطه سيدنه هاي المرجيه منك !!
خلف الدواح _ جا شتريد مني ..... أضمك بيتي .... اذا انته يوميه امسويلنه طّلابه ..... يوم ويه القاعده ... يوم كالب عليهم .... ويوم عازم بوش .... يوم بأحضان الأئتلاف .... يوم زعلانه ويه ابو ريشه ويوم ساب علي حاتم سليمان ..... يوم زاير قبر خميني .... ويوم زعلان على السيد عمار.... ماتكلي يمته يصفه رايك وتعقل يا شيخنه ؟؟
المتصل _ الله كريم سيد لكو ..... أنتظر شراح يصير بك ( انقطع الاتصال من قبل الكنترول ) !!
خلف الدواح _ استغفر الله ..... ربنا لا توخذنا على ما قاله اصحاب الصحوات بحقنا انك السميع المجيب !!
المذيعه _ الو .... منو حضرتك ... السيد على الخط
المتصل _ سيدنه آني ابو داوود !!
خلف الدواح_ هله ومية هله ما خاب من قال فيكم ( مات اللمبجي داوود وعلّومه )
المتصل _ شنهي سالفتك سيدنه .... آني ابو داوود ليش ما عرفتني ؟
خلف الدواح _ شلون ما عرفتك غير انته البعت الحزب بسوق النخاسه ... من خليت أيدك بيد الاحتلال وأدلائه
بشرفك لو يطلع الرفيق فهد من كبره شراح تكلّه ؟
المتصل _ سيدنه رحمه لوالديك ... هسه مو وكت عتب ... شوفلي حل لقضية الحزب ... عدنه 70 الف شهيد وطلعنه من المولد بدون حمص !!
خلف الدواح_ والله آني حالف ما حط ايدي بيد العملاء .... اودعناكم رفيق طواطه !!
المذيعه _ الى هنا تنتهي حلقتنا لهذا الاسبوع ... وسنلقاكم في الاسبوع القادم شاكرين متابعتكم وشاكرين ضيفنا العزيز والى الى اللقاء
خلف الدواح_ ( مقاطعا ) ها .... كطعتو البث ( وقبل ان يأتيه الجواب) راح و نزع عمامته ووضعها جانبا وهو يتمتم .... ( الله اكبر .... عمي هذي عمامه لو شيلمانة حديد .... الله يساعد السيد شلون شايلها من الصبح لتالي الليل ) ؟؟
المخرج _ شسويت سيدنه احنا على الهوا !!
انتهى
Watan_1957@yahoo.com