الخال عبد الرحمن

2010-05-17 13:59:59

الخال عبد الرحمان

من فاطنة ويامنة وعمال السد
من اخطاء مقصودة وعم القط
من ابنود وبرود وارمنت .. وبلاد من بعد السد
من ناس حزنانة
مسلم كان او قبط
للواد رمان
للسان وعران
أبو أية ونور
الخال عبد الرحمان
قال تعبان !
تعبان ايه ؟ الرئة ولا الوجدان
ايه جد عليك ؟
طول عمرك تعبان
ولكنك بتعافر وتناقر..
وبتزرع تعبك ف كلام اشكال والوان

وقالتها يامنة ..
طول عمرك وعران
ابنودى وبالف لسان
لا عمرك بتخاف السلطة ..
ولا عمرك بتخاف سجان
طول عمرك انسان ..
الحق دا سيفك ..
والشعر حصان
لفيت بيه العالم ..
وجاى دلوقتى تقول تعبان ؟
قوم والنعمة يا خال
يللا اوقف اصلب طولك
مصر محتاجة امام
محتاجة الواد رمان .. الخال عبد الرحمان
قوم بالذمة يا خال
لساها ارض الشعر بتطرح
لساها مصر علينا بتنقح ولساه القط ..
وسط الجدعان

راجع من يم اسوان
رايح على ابنود
بيفتش على رمان
وبيحلم يلقاه ويا ابو زيد
يا ابو زيد الزمن الجاى
" احمد سماعين "
" وحراجى القط "
الدمعة من عينى والله رايحة تفط
تتعب وحدك ..
امال ايه لازمتنا يا خال
اجدعن عاد
يامنة مستنية تاجى لجاى ..
تشرب مع يامنة الشاى
قولها ياخال ..
قول حاجى يامصر وجاى
لساها يامنة معاها كلام وحديت ..
وحالفة ماحد يترجم عنها ..
غير رمان