الخالعات !!

موضوعى النهاردة الخالعات ..للأزواج …مش للهدوم !! الخلع يعنى من غير فذلكة ….يعنى ان الست بعيد عن السامعين تخلع جوزها قصاد انها تبريه …يعنى ايه تبريه عشان اصدقائى العرب …يعنى تبرئه من كل حقوقها المادية قصاد انّها تخلص من وش اللى جابته !!

دة المفروض !!

لكن الواقع الرائع شىء آخر تماما .

طيّب

نرجع من الأول خالص

عن عكرمة، عن ابن عباس؛ - أن جميلة بنت سلول أتت النبي صلى الله عليه وسلم فقالت: والله! ما أعتب على ثابت في دين ولا خلق. ولكني أكره الكفر في الإسلام. لا أطيقه بغضا. فقال لها النبي صلى الله عليه وسلم ((أتردين عليه حديقته؟)) قالت: نعم. فأمره رسول الله صلى الله عليه وسلم أن يأخذ منها حديقته ولا يزداد.

وتناثرت الروايات فى شرح الحديث , وعن أسباب طلب الزوجة الخلع من زوجها , فكان أكثرها يدور حول أن ثابتا هذا كان دميما جدا , فاستوحشت منه , وبغضت ( شكله ) لا خٌلقه ولا دينه , بمعنى ….أن النفور العاطفى وحده يكفى لطلب الخلع وقد أقرّها النبى ( صلى الله عليه وسلم ) على ذلك …ولم يصفها بالميوعة ولا بالدلع ولا بأنها لازم تتحمل جوزها لأن العيلة مفيهاش حالة طلاق واحدة …وعيب تكونى اول مطلقة فى العيلة …الطلاق أشرف ألف مرة من أن تزنى الزوجة …لأن للغريزة أحكامها …وشريعة الإسلام تحترم الانسان وتضع له كل السبل ( الشرعية ) ليظل راقيا كما يجب أن يكون .

طيب

الصحابى دة كان مقدم ( مهر ) عبارة عن حديقة نخل لزوجته ….وهو مانسميه الآن مقدم الصداق …وتم الطلاق على رد مقدم الصداق …ولم يرد فى الحديث أى نص على ( عفش ) ولا ( منزل زوجية ) !

دلوقتى – فى مصر – محدّش بيقدم مهر .. بيكتبوا فى وثيقة الزواج مقدم الصداق 25قرش ..ربع جنيه يعنى ….قصاد أن العريس يكتب مؤخر صداق متفق عليه …بدل المهر اللى ما دفعوش !!!

طيب والعفش …أو الأثاث …بيتكتبوا فى حاجة سودة هبلة اسمها ( القايمة ) …مين القذر اللى اخترعها …معرفش !!…وبتعتبر (المنقولات ) بمثابة حق مدنى …لا تتنازل عنه الخالعة !!!….لأنه لا يدخل ضمن الحقوق اللى تتنازل عنها …بل الأدهى …انها بمحضر معفن فى اى قسم بوليس ..تقول ان المخفى جوزها بدد العفش …او باعه …يلبس مصيبة …ويتجاب من قفاه ….انت ياض يا مُبدد …بدّدت العفش ؟؟!!!…..لا يا باشا والله ..دى هى اللى طفشانه وسايبة البيت ..!…..تروح معاه قوة ظريفة من الشرطة عشان تثبت ان ( المنقولات ) اللى فى القايمة عفيفة شريفة لم تٌمس بسوء ….وممكن نرحّل العفش كله على اى خرابة عشان المدام تنبسط !!

العفش بقى …دة بلا مبالغة عبارة عن الاف الجنيهات اندفعت بطلوع الروح , وبعد جمعيات وسلفيات وبلاوى زرقا كتير وممكن كمان كمبيالات شغالة عشان العفش بالقسط …يعنى جه بالدبح عند الغالبية العظمى من الشعب المصرى العظيم !!!

الزوج بعد ما شطب تحويشة عمره وتحويشة عمر ابوه …وامه كمان …معرض فى لحظة عشان الزوجة مش طايقاه – دة شرعا و قانونا يكفى - انها تاخد كوووووووووووول حااااااااااااااااااااااااااااااجه …ويا سلام لو فيه طفل ..تاخد الشقة بالتليفون ..عشان حاضنة ….وفيه اقتراح بتعديل فترة الحضانة للزوجة من 12 سنة ل18 سنة ….يعنى الزوج ينسى الشقة لو باسمه نهائى …ولو مش باسمه …يبقى هيقعد يتفاوض للصبح على نفقة السكن والحضانة …وبيقبض كام …وحيتبقى كام …المهم ….يقصصوا ريش امّه بشرط ان يطلع على البلاط …فما يقدرش يتجوز تانى مدى الحياة !!!!!!!!!

استنى

طيب ومؤخر الصداق ؟؟!!

لو الزوجة جالها مزاج تتنازل …مالهاش هتاخده برضه ….ليه ….لأن الف محامى ابن حنت يقولها ..بلاش الخلع اللى هيخسّرك المؤخر …احنا نخلّيها تطليق للضرر ….فهنا هتاخدى بقى المؤخر ….بدل منتى هتاخدى العفش والشقة بس !!!

والطلاق للضرر سهل جدا …نفبرك محضر وكشف طبى مضروب انك متدغدغة وكام شاهد زور انه ضربك وهّزأك ومسح بيكى البلاط قدام الشارع كله ..والجيران وجيران الجيران ….أى خدمة يا هانم !!!

طيب

اكيد الستات اللى بيقروا حيسألوا : يعنى كله اللى بتطلب الخلع مستهبلة فى امها ….والرجالة دول ملايكة ..ايه …ما سمعتش عن الرجالة الرمم اللى مش راضيين يطلقوا زوجاتهم الا لما تكتبله تنازل عن كل حاجة …المؤخر والعفش والنفقة ….والا يخليها زى البيت الوقف …لا متجوزة ولا مطلقة ؟؟!!

سمعت طبعا …وعارف ان دة موجود

انا بعترض على القانون الوضعى ..مش الشريعة والعياذ بالله

يعنى

اللى عاوزه تخلع …وعندها ضمير وشايفة جوزها ماظلماش …لكن هى بس اللى عينيها (زاغت ) على حد …أو …قرفت وخلاص …تمشى زى الصحابية الجليلة اللى فى الحديث ….ترد على الراجل اللى دفعه …خصوصا ..انها بلسان الواقع …حتسيب العفش بس …وغالبا …أى أثاث قديم بيباع أقل من القيمة التى تم بها شراؤه بمقدار 70% على الاقل ….لو العفش اتكلف كله مثلا 30000 جنيه ….لو اتباع بعد خمس سنين جواز …لو جاب خمس تلاف يبقى كويس !!!….والشقة …تسيبهاله حتى لو حاضنة !!

دة الضمير

لكن …مين عنترة دة فى مصر اللى بعد ( علقة ) الخلع ..ممكن يتجوز تانى ؟؟!!

طبعا ما بتكلمش عن مدحت صالح ولا عمرو دياب ولا احمد حسام ميدو …..دول – ما شاء الله – ممكن يتجوزوا الف مرة …..انا باتكلم عن الناس ….الاغلبية .

ونفس الكلام يقال للرجل ….انت عاوز تطلق …خليك راجل وطلق واتحمل تبعات قرارك – ماديا ومعنويا – لكن شغل التطفيش …عيب وقلة أدب وانعدام رجولة .

قال تعالى

" يَا أَيُّهَا الَّذِينَ آمَنُوا لَا يَحِلُّ لَكُمْ أَنْ تَرِثُوا النِّسَاءَ كَرْهًا وَلَا تَعْضُلُوهُنَّ لِتَذْهَبُوا بِبَعْضِ مَا آتَيْتُمُوهُنَّ إِلَّا أَنْ يَأْتِينَ بِفَاحِشَةٍ مُبَيِّنَةٍ وَعَاشِرُوهُنَّ بِالْمَعْرُوفِ فَإِنْ كَرِهْتُمُوهُنَّ فَعَسَى أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا (19) "

سورة النساء

وبالنسبة للخالعات أهديهن هذا الحديث

عن أبي قلابة عن أبي أسماء عن ثوبان قال : قال رسول الله صلى الله عليه وسلم : أيما امرأة سألت زوجها الطلاق من غير بأس فحرام عليها رائحة الجنة

يعنى واقعة الصحابية كانت لأن زوجها ( شديد ) الدمامة , فخشت على نفسها الفتنة . لكن واحدة تطلب الخلع ..عشان جوزها بيشخّر وهو نايم …يبقى استهبال !!!

على فكرة

حصلت !!!.