الحكاية من البداية لقبل النهاية

    عايزين تعرفوا الحكاية        

   من البداية لقبل النهاية          

    ماشي اهي الرواية              

    قالت أمي آه                    

  جري ابويا جاب الداية           

    شدتني من رجلي               

   قلت آه                           

    وكانت دي البداية             

    وأول قلم علي قفايا           

   سبع أيام بالتمام والكمال       

   وانا صابر صبر الجمال      

   بلح وفشار وحمص           

   والكل عمال يرقص           

  واسمع كلام أمك                

    وحب عمك                   

   وسيبك من خالتك              

  وخليك مع ستك                 

   أكل ولعب ومرح             

   ودايما في بتنا فرح           

    فرح بالعود اللي طرح       

   وفي السوق لسه ما انطرح   

    كفاية كده يا ابو امام         

  لازم يدوق الألام               

   ست سنين بالتمام             

   وابتدت رحلة العلام          

   من بتاع العيال                

  للمعيز والجمال                

  وما مشي الحال                

  والله ده موال                  

   ابتدائية واعدادية             

  وبعدها الثانوية                 

   والله كبرت يا ابن سنية       

    وراح تدخل الكلية           

    دي العملية بقت مهلبية      

    وانا لا بيا ولا عليا          

   وعمار يا مصر عمار       

    اتعلمت وبقيت حمار       

   يشفي فيا الجزار            

   شوية شوية علي النار      

   يادي العفار                  

   والعيشة الدمار               

    مافيش فيها فنار            

   في وسط الأنهار             

   ينور جوه الدار              

   ويبعد عنا الأخطار          

   ولا كله طار                 

   نورت والله يا بن نوار       

   وزودت الحمير حمار        

  ودي بداية الحكاية            

   من أول الداية                

    لقبل النهاية