الضيقه اللي حيّرت رووس الأقلام
                  منها الضلوع العوج ضاقت بكوني
ترتبت بي وأعزفت صوت الأنغـام
                    وجاوبتها بأنغـــــام لوعـة لحونـي
يكفي كفاني .عازف الجرح لي عام
                    ينبش ورى عوج المحاني طعوني
أرهقت جفني عن كرى النوم مانام
                 وأسرفت بي مابين .. شكلي ولوني
اللي رسمته في تباشيـر الأحــــلام
                    مابشـــرت بـه حايـرات الظنونـي
يامستتيب الوجـد والشـك هـدام
                    من حيرتك وشلون تجرح جفونـي
لوكنت حلم العمر في وجه الأيـام
                    ماجيت من عاليك .. تهدم أركوني
والتوبه اللي عذرها خان الأقسـام
                  وش عذر غـــــافرها بعـد مايكونـي
أكبر جريمه .. عاين الوقت ظـلام
                وأعظم جريمه قدم جرمك تهـــــونـي
أرحل حقيقه .. ماتمر بك الأوهـام
              وأتـرك بقـــــــــــــايـا مابقالـك يمونـي
هاذي مرابط خيل الأسرار مرسـام
                ملجم حصان البوح داخـل سجونـي
أموت وأعطاشي على جمك حيـام
              وخـــام الكفن بأسرارهـا يدفنونـي

الشاعر  :  سعد المسعودي

[ الحرالأشقر ]