البرواز والصوره في طيحه ملك من فوق كرسي

على رمل الطريق اللي تلبس با الفراق وشاح
كتبت اسمك وعنوانك(غياب الحب وحضوره)
وقفيت وتركته عبره لمن جا عليه وراح
وحوله كلمتين مبعثره طفله ومغروره
طفيت الشمع با الدمع ورميت بزندي القداح
وخليت الظلوع شموع تحت دموع منثوره
مثل دمعة كريم حاجته جت في يدين شحاح
وعيو دونها واقفى وغص بريق حنجوره
قتلت الشوق في روحي واثر للشوق سبع ارواح
تجي روح وتروح روح منهيه وماموره
اطير لك حمام الشوق ويعود كسير جناح
وانا وش لي بشوق وطاير وجنحان مكسوره
عسى الليل الضرير اللي خذاك وكسر المصباح
يجي يوم ويسوق العذر للمصباح في نوره
حبيبي كان من عينك غلاي اللي تقوله طاح
مثل طيحة ملك من فوق كرسي فوق مقصوره
عزاي اني قطفت اغلى زهر بستانك الفواح
وفي قلبي بقايا العطر والبستان وزهوره
ليا صار البحر رحلة خطر موج ومطر ورياح
يموت الحوت والبحار ياخذ ثار بابوره
ولا صار الهوى ما له دوى الا مشرط الجراح
يعيش الحب بامر الطب لو يموت دكتوره
حرام ان الغرام مقطع اربع مجرم وسفاح
ولا ياوي لاحد لو كان ريس مجلس الشوره
ما دام انه ليا منه ذبح يذبح بغير سلاح
وش يجيبه تحت حكم الكتاب وسيف اخو نوره
يجي مثل الرعد والسيل ويهلي به الفلاح
ويزرع في ثرى الشريان حب الوصل وبذوره
ويقفي قبل يصفي معركه كبرى وطعن رماح
صهيل خيول عرض وطول والرايات منشوره
تبا ترتاح يا قلبي؟ من اللي فا الهوى مرتاح
وانا اريحك من ضيم الزمان وظلمه وجوره
لو امسكت العصى من نصها يا الراعي المصلاح
صلح حال الرعيه والعصى ماهيب مشقوره
حبيبي دام انا المذبوح وانت القاتل الذباح
اخذ مني وصاة مودع دنياه لقبوره
غدا يذوي جمالك بعد موت الورد والتفاح
ولا يبقى من الذكرى سوى البرواز والصوره