الأنتخابات والحكاوي

إجتمع أربعة شيابين من العهد البائد الأول متع الملك  في قهوة  كان بسمونها زمان  قهوة الاورورا والله توه ما نعرف شو سموها  تغيرت الأسماء في طرابلس  كان الميدان نسموه بياتسا دي إيطاليا بعدين سموه ميدان الشهداء جي القذافي ووسعه وسماه الساحة الخضراء ،  وتوا رجعوه ميدان الشهداء . شارع الكورسو سموه شارع الأستقلال ثم سماه القذافي شارع محمد المقيرف .وتوة ما نعرفش سيسموه ممكن يسموه بأسم الواداي الذس قتل الفاجر المقبور في مجراه . القذافي الله لا يرحمه الغى أسماء الشوارع وأرقام البيوت . اليوم تقول للواحد وين ساكن يقولك  جنب الجامع أو جنب الكازيرمه  او جنب السبيتار . وأرقام الحيشان ألغيت ومعاش فيه بوستة ولا بسطاجي الذي كنا راجوه فيه كل يوم .
جلس الأربعة شيابين وطلب كل واحد كبوتشينو وواحد قال نبي  كروأساو لاني ما أفطرتش الحاجة رقدت  وما صحتش وما  حضرتش الفطور كيف العادة . وبعدين بدت الهدرزة
الشيباني محمد – قالوا بيديرو  إنتخابات  بعد الثورة التي نسيناها من أيام الشايب . بيس يعملوا مؤتمر وطني يدير حكومة جديدة  ويدير دستور كيف متع زمان .
الشيباني حسين – زعمك الجماعة الجديدة يسيبو الحكومة . القذافي قعد 43 عام وهدوم يمكن يبقوا خمسين لانهم ثوريين .
الشيباني  مفتاح -  وسمعت ناس بيديروا أحزاب  كل واحد شمر سوريتا  ودار حزب وسماه كما يبي ، بيش يصبح نايب ولا وزير .
الشيباني مسعود -  وحنا لازم إندبروا حزب قبل الحواتيت ما يأخذوا الحكومة ونقعد على برة  ونسموه حزب أولاد زمام
الشيباني  محمد – هذا الاسم ما ينفعش  لازم نسميه حزب الحرية  أو الحزب الديمقراطي . الحزب الاشتراكي
الشيباني مفتاح –  لا حزب إشتراكي بعدين يسموك شيوعي كافر. أما الأسماء الأخرى التي ذكرتها هذه خدوها الصحاح من الأول  ومانقدروس نكرروها  . ممكن نسموه حزب النهضة ولا الحزب الاٍسلامي ولا العدالة .
الشيباني حسين – إيوه خلوهولك  هذه الأسماء نجحت في مصر وتونس وأخذوها الأخوان المسلمين . أحسن حاجه خلوا الأسم حزب شيابين زمان  وخلاص .
الشيباني مسعود -  وكم نفر نبو بيش إنديروا حزب ؟
الشيباني حسين  - إحنا أربعة ندور واحد ولا أتنين أخرين  ونكتب كاغط رسمي  ونوقعوه ونعلنه في الجورنال  بيش رشحوا أنفسنا  ووالله قالوا فيه أحزاب فيها واحد ولا أثنين بس .
الشيباني مفتاح- وفيه قانون أحزاب يبين الشروط  ولا لا ؟
الشيباني مسعود- قانون إيه إحنا في ثورة  لا قانون ولا دستور وكل واحد ببندقيته يدور وما فيش حتى من ينظم المرور .
الشيباني محمد – انا قريت في الجونال قالوا كل ليبي يأسس حزب لازم يحصل على ألفين توقيع تزكية منهم على الأقل ميه من كل مدينة كبرى في غرب ليبيا وشرقها وجنوبها  وكل من يرشح نفسه يحتاج ألف توقيع تزكية .
الشيباني مفتاح – هذا كلام جرايد يكتبوا فيه المتعلمين ما عندهمش شيديروا ما فيش حد يسمع الكلام هذا  .
الشيباني حسين – الأنتخابات تبي دعاية وفلوس ووزير ولا أثنين يدفوك .
الشيباني مسعود -  حنا نجمع كل ما عندنا من خرفان وجمال بيش ندبوحوهم ونديروا زرادي للناس الي بينتخبونا . 
الشيباتي محمد – زرادي بس ما تنفعش  فيه جماعة تبي تلحس  ويبو فلوس كوارط بيش يجيبوا الناس ويبشبشوا على الناخبين  وموظفي الحكومة .
الشيباني مفتاح – نتسلفوا  من البنك ونرهنوا السوينيات والحيشان  ولما ينتخبونا  للبرلمان  نسترد إفليساتنا من العطاءات .
الشيباني حسين -  ياشيخ مفتاح أنت تتكلم عن الماضي . البرلمان القادم  برلمان ثوار بيحاربوا الفساد وماتعباش على العطاءات .
الشيباني مفتاح – قالك ثوار! الثوار كلهم بداوا قحيانين  وولوا بعد عامين أصحاب ملياردات . تصور القذافي وجماعته لما قاموا بالثورة  كانوا معندهمش دينار في البنك ، وإعتبروا كل من عنده ألف دينار رأسمالي مستغل للشعب ، وحطوا كل الوزراء والنواب والمسئولين في الجيش والامن والتجار الكبار في سجن بورتا بنيتوا الذي بناه موسليني في العهد الفاشيستي وحاكموهم وبعضهم مات في السجن  ومعرفوش سبب الموت  . واحد وزير حكموا عليه بالسجن عشر سنوات لانه أخذ علاوة سفر سبعين دينار وضابط أمن أعتبروه مجرم لأنه أخذ علاوة 30 دينارا لينام في العراء أثناء الأنتخابات . تصور كيف أصبح القذافي والضباط الأحرار  يلعبون بالملياردات .وأولاد القذافي أصبحوا يرموا في الملايين على أحذية الراقصات والمغنيات . التوار في كل البلدان وطلاب الأشتراكية والوحدة والعدالة الأجتماعية كلهم زي بعض . كلام يمشي مع الهواء وكل وزير ونايب يدور على مصلحته ومصلحة أ ولاده .. خلي ثوارنا  الجدد عامين ولا ثلاتة وبعدين شوفهم أصحاب ملياردات وقصور وسيارات وحوائز وعمارات في ليبيا وبره . وتشوف  الفساد  الحقيقي ألي ما عرفتاس البلاد  في كل زمان .
الشيباني مسعود- الشيخ الريس قال الشعب الليبي 90 % مسلمين معتدلين  ولهذا بيش تنجح في الأنتخابات لازم تخشوا حزب إسلامي بيش تفوزوا في الأنتخابات وتربوا لحية طويلة  وديروا بقعة الصلاة في الجبهة  وكل واحد يحمل القران الكريم وسجادة الصلاة .
الشيباني محمد –  يا جماعة قولولي شو الفرق بين الاسلام المعتدل والاسلام السلفي ؟ إحنا نعرف إسلام واحد واركان الأسلام الخمسة وكل الناس المسلمين مؤمنين بدون فقي ؟ .
الشيباني  حسين – كلهم واحد لكن المسلمين المعتدلين كيف الاخوان المسلمين نسوانهم يلبسوا الحجاب  بس ويتعايشوا مع الأجانب والمسحييين وفالحين يتمسحوا وزمزكوا لفلسلطة العليا والجيش بيش يساعدوم على النجاح في الانتخابات والوصول إلى الحكم كما حصل في مصروتونس ، ويقولوا مرسيدس وحساب بنك ووزير خير من  السجن والتعذيب والتنكيل .  أما السلفيون فهم مشكلة والفرق الوحيد بينهم وبين المعتدلين  هو أن نسوان السلفيون يلبسون النقاب ويحاربون الكفار .
الشيباني محمد- ما وصلنا لشئ ندير حزب ولا ننضم الى حزب النهضة الأسلامي ايهما احسن .
الشيباني  حسين – الشيخ الريس لازم يعرف  ومرتب الأمور زي تونس ومصر قال 90% من الليبيين إسلاميين  معناه البرلمان القادم أسلامي 100%  ويا بختكم يا ليبيين  في الجنة  خالدين  وسعداء في حياة الدنيا والدين .
الشيخ مفتاح- خلاص غدوة ندور على عنوان حزب إسلامي ونسجلوا فيه  بالك يرشحونا  في قائمتهم .
الشيباني حسين - والله يوم مبروك أهو حصلنا شندير بعد 42 عام بين القهوة والحواشين والسرير  .
الشيابين في صوت واحد -  إن شاء الله نتلاقى قي المؤتمر الوطني  مع البهوات الجدد والتجار الكبار والمشايخ  ونفتكروا أيام زمان التي كان  فيها الشايب يخطب والنواب تصفق والوشنات في الحواشين  تزغرت  . يا شينك عز يا ليبيا .