الأرض هي العرض

اليوم يوم الأرض , وشعبنا ما زال عالعهد , الأرض في قلوبنا في الحفظ والصّون , واللي يخونك.... يخون العرض . كيف ما نصونك ؟ وانت كنت إلنا مهد , ورح تكوني إلنا لحد , ما يهمّنا لو نمنا عالصّخر , لودسنا حافيين عالشّوك , لو مشينا حافيين عالجمر .

اليوم يوم الأرض ... والأرض أرضي والبلد بلدي , ورثتها من جدّ جدّي , ورح أورّثها لولدي ولولد ولدي , أنا وعدت أبوي , ووعد الحرّ دين , وعشان هيك لازم أوفّي بوعدي . أنا رضعت حبّ الأرض مع الحليب , ولا يمكن أتنازل عنها للغريب .

اليوم يوم الأرض ... وأرضي مباركة وفيها الخير موجود , نفديها بمالنا , بأولادنا , بارواحنا , وبدمنا عليها ما نبخل , وبدمنا عليها نسخى ونجود ,ولا بدّ ييجي يوم , نرجع فيه عبلادنا , وعديارنا مهما طال المشوار لا بدّ بنعود .

اليوم يوم الأرض , والأرض بارواحنا نفديها , بعرق جبينّا نحييها , بسواعدنا نبنيها ونعلّي رايتها وبصدورنا نحميها ,وإذا عزّت الميّ بدموع العين نرويها . الأرض هيّ الأمّ الحنونة , والغربة مثل مرة الأبو المجنونة .

اليوم يوم الأرض , و الأرض أنا عنها أبعدوني , حطّوني في مخيّم لاجئين ونسيوني , بعد ما خيمة وبطّانية وكيس طحين وعلبة سردين أعطوني ,
أنا ما بدّي طحينكم , أنا ما بدّي سردينكم , أنا ما بدّي بطاطينكم ما بدي خيمكم , بس بدّي على صبّارين ترجّعوني ,,,,,,اليوم يوم الأرض, واللّجوء وصمة عزّ وفخار مش وصمة عار على جبيني

اليوم يوم الأرض , وأنا عنّك يا أرض صبّارين بعيد , وشوقي إلك في قلبي بيشتعل , وحنيني إلك كل يوم عن يوم يزيد , اسمع يا أمجد , وانت يا أشرف , وانت يا أيمن , مثل ما قال سيدكم عيسى عبد المجيد , لازم نرجع ..بس لمّا ربنا يريد , لازم نرجع .... بس لمّا ربنا يريد .