اكتشاف اكبر حقل للغاز في الاردن ..

يعني هالمواطن الاردني مش قاصر ولا قصير نظر ،مثل ما هوه مش مبذر ولا هوه كثير تذمر وكثيرطلبات.. يعني اللي بدوه اياه مش معجزة يا عالم ، مبارح كنت قاعد مع رفيق من رفاق الدرب الطويل في هذه الحياة الصعبة ، وقال بصوت كانه يحكي مع حالو..شو قال قال : كنت بطلع على خارطة الوطن العربي ، وركزت على الدول المجاورة للاردن .. شو بالك لاحظت ؟؟ تطلعت فيه وقلت : اه شو لاحظت ؟

قال :

شوف هاي السعودية نبع من البترول .. طيب يا سيدي .. الناس بتقول هاي الخيرات في السعودية دعوة نبي .. طيب ماشي ..يعني موافق انها دعوة نبي ..ورحت وشفت العراق ولقيت انها كمان نبع بترول وغاز وكاز ومي كمان  شوف دجلة والفرات ،ورحت على لبنان وسوريا وطبعا فيهم خيرات ما يعلمها الا الله .. يعني شوف نهر الليطاني والعاصي ودجلة والفرات كمان  .. وشوف شاطىء المتوسط اللي يمتد على طول لبنان .. وبرضو سوريا كمان .. والغاز والبترول فيها صحيح .. يا مصلح ولا انا غلطان ؟

قلت والله كلامك لحد الان صحيح 100/100 ..تطلع في عيني وقال :

طيب يا مصلح سمعت بالخبر الاخير ؟

اي خبر ؟

الخبر اللي بقول ان اسرائيل الله لا يعوضهاولا يكسبها ..اكتشفت في شواطىء حيفا .. اكبر مخزون غازي في العالم ..وطبعا يا مصلح لا تنسى البترول في النقب وبئر السبع ..ومواقع اخرى انا والله ما بعرفها بس بعرف انه عندهم بترول كمان زي باقي خلق الله ..

هزيت راسي وكاني اقوله كمان شو بدك تحكي ..

هز راسه وقال : بدي اسأل سؤال غبي .

قلت تفضل يا غبي .

قال : والله يا مصلح ما انا قادر افهم كيف هالدنيا كلها من حولينا فيها بترول ومي من دجلة والفرات والعاصي والليطاني .. يا زلمه حتى فلسطين كلها ينابيع وانهار .يعني ليش الاردن .. يعني شو مالها .. يعني الله غضبان عليها وعلى الناس اللي فيها ؟

قلت يا رجال وحد الله ...

قال طيب ..

قلت وحد الله

قال : لا اله الا الله وبعدين نعم و شو في ..

قلت ولا اشي .. انا نفسي مش  فاهم الطاسة ..

اي طاسة واي غطاه ..

قلت لا طاسة ولا غطاه ..

قال : طيب سمعت ما بعرف مين هذا اللي كان على التلفزيون نورمينا مش عارف جو سات اللي قال : الاردن فيه بترول وغاز اكثر من السعودية وقطر كمان ..وقال اذا طلعت كذاب اشنقوني على باب الجامع الحسيني .. وطلب مقابلة الملك .. سمعت بهالحكي ولا ما سمعت ؟

سمعت .

صدقته ولا كذبته .

والله مش فاهم الطاسة ..

قال وهو يقف : اي طاسة .. شو انت عايش بالمطبخ ..

يا زلمه هو قال .. والنسور قال .. وهذاك قال .. و..بس وين الصحيح .. شو فايدت القول عمي .. احنا بدنا نحط عالنار ..

قال : اي نار يا زلمة ؟ شو مالك انت بردان ..

وسحب حاله هذا الرفيق وخرج ..

بس لما قعدت لحالي وصحيت ..سألت نفسي السؤال التالي :

هل صحيح احنا عندنا بترول وغاز ؟ واذا كان فيه ليش ما بنطلعه ( لا يروح ذهنك لبعيد بكلمة بنطلعه .. انا اقصد بنطلع البترول والغاز كمان مش اشي ثاني )  ومين اللي مانعنا من تطليعه ( البترول والغاز طبعا مش اشي ثاني ) وليش مانعنا .. وشو ماسك علينا .. وشو سلطته وقوته حتى يمنعنا .. يعنا انا بقول يله يا عالم خلينا بنطلعوووووووووووووووووووووووووووووووووووووووو  وبسرعة لانه احنا ملينا.. وزهقنا وهما مخبيينو.. وسلام غاز وبترول ..