ابو الهول و حوسحوس مرشح الرئاسه

سا لخير يابا الحاج أبو الهول ..
إزيك كيديه وإزاي لحوال .. آني كنت فايت ف ريحك جولت أفوت أسلم عليك ..
البلد كُلاتها النهارديه خدتها النداهه ولا مؤاخذيه ..
لأ .. النداهه دي يعني كل نفر بيحكي علي ليلاه إي والنبي ليلاه ..
ناس بتحكي ف الداستور , وناس بتحكي ف مجلس الشعب , وناس بتحكي ف الرياسه ..
الناس حيدانا ف البلد بيجولم دماغنا وجاعنا م البوليكه دي م نخليها شراكيه وخلاص ..
لأ .. شراكيه يعني كل نفر يُبجا ريس نفسه ..
بس فيه ناس بتجول حتما ولابد ولازوما يبجا لينا كُلاتنا ريس يُشكُمنا ..
وفيه ناس يامه جالوا ح نترشح للرياسه عشان نُشكُم الشعب ..
بس فيه نفر منهم إسمه "حُوسحُوس أفندي اللي مجنن النسوان" جال آني ح اترشح ومش عايز أشكمكم ..
لأ .. حُوسحُوس إفندي ديه ولا مؤاخذيه جال آني الحِنين ع النسوان ..
جوم إيه النسوان كُلاتها جالت والنبي لنرشح حوسحوس , أُمال إيه إحنا النسوان نص البلد عايزين ريس حِنين ولو لفينا الدنيا كُلاتها مش ح نلاجي نفر زي حوسحوس ف الحِنيه ..
وحوسحوس أفندي بيجول آني حابتدي الحمله لنتخابيه بتاعتي وح أرفع شعار "الحِنيه دي شُغلانتي" , والنسوان ياولداه ح تتجنن عليه ..
والبهوات المترشحين كُلاتهم ح يتجننوا ..
لأ .. مش زي النسوان , فيه ناس منهم راحوا ياخدوا دروس ف الحِنيه , وفيه ناس منهم بيجولوا الحِنيه حرام لا تجوز شرعا , وفيه ناس جالوم حوسحوس ديه كافر والعياز بالله واللي يتنخبوا يبجي كافر زيه , وفيه ناس جالوم حوسحوس ديه علماني لبرالي يساري إفتهازي ..
لأ .. آني م أعرفشي إفتهازي يعني إيه , بس العِلم عند الله يمكن تكون سحليه عدت ع بطنه وهون نايم ..
لأ .. حيزب الوفد م جالشي حاجيه علاوليه ع حوسحوس ..
لأ .. مفيش ولا فِل م الفلول جال حاجيه ع حوسحوس ..
والست الفنانه نانسي أم عجرم بتعمل غنيوه إسمها "حوسحوس يا مجنني" ..
والجمعيات النسوانيه اللي مش متشهره علجَت يوفط ع بابها مكتوب فيها "حوسحوس نصير النسوان" و "بالروح والدم نفديك ياحوسحوس" و "وياك الدُنيا حيلوه يا حوسحوس" و "حوسحوس يا حنين ع الويسط " ..
لأ .. ويسط البلد .. إختشي يابا الحاج أبو الهول ..
والنسوان كُلاتها ناويين يروحوا التحرير عشان حوسحوس ..
وإنت يابا الحاج أبو الهول ح تنتخب حوسحوس و اللا مالكشي ف الحِنيه ..؟
أستر ع حوسحوس يارب ..
مجدي المصري