ابو الهول وقاعه مجلس الشعب

أبو الهول وقاعه مجلس الشعب ..
السلامو عليكو يابا الحاج أبو الهول .. إزيك كيديه وإزاي لحوال ..
لا .. الدُنيا حر علاوليه اليومين دولم والناس كُلاتها مفرهده م الحر ومحدش جادر يكَّلم ..
لا .. الناس ف البلد بيجولو الحَكومِه هي اللي جَالَت للجماعه بتاعوت لَرصاد الجَويِه يخلو الدُنيا حر علاوليه عشان الناس كُلاتها تِفرهَد وتِنْكَن ف بيوتها ..
لا .. آني مش جايلك عشان الحر .. آني جايلك النهاردِيه عشان فيه كلام كَتير داير ف البلد
إيويه .. الجَاعِه بتاعت مجلس الشعب ولا مؤاخذيه .. إيويه اللي بيجعدو فيها لعضاء الموكَرين
الناس بتجول الجاعِه ضَيْجَه علاوليه والساده لعضاء الموكَرين لما كُلاتهُم بيحضروا عشان ولا مؤاخذيه-موافقون-موافقه-بيجعدوا علي رجلين بعض م الزحميه ..
طب يابا الحاج أبو الهول الكلام ديه جِبْل م يعملو الكوتيه للنسوان ف المجلس .. والنبي يابا الحاج الناس حيدانا ف البلد طافحين الكوتيه والحكوميه بتعمل كوتيه للنسوان ..!!
ما علينا يابا الحاج الحكوميه هين اولي الامر منا وإحنا علينا السمع والطاعيه .. وأطيعو الله والرسول والحكوميه ..
هلوجتي الناس كُلاتها بتجول الجاعَه بتاعت مجلس الشعب ح تُبْجا بعد الكوتيه زي اوتوبيس الالف مسكن لحم فوج بعضه وديه يُصوح بردك يابا الحاج الساده النواب الموكَرين والساده النائبات الموكرات يُبْجُم لحم فوج بعض ..؟
طب لو ست نايبه موكَره ولا مؤاخذيه عايزه تعدي .. تعدي إزاي ف وسط النواب الرجاليه ..؟
وبعدين يابا الحاج إحنا ناس فلاحين ونختشي والحكوميه لازم تختشي .. إيويه أُمال إيه ..
آني بَجول الحكوميه تعمل نظام إنتساب زي الجامعيه .. الساده النسوان النائبات يجعدو كل واحديه ف دارها والمجلس الموكر يبعتلها محاضر الجلسات ع الدار وهي تصوت براحِتها ف الدار .. ومنه أهي تِطبُخ لعيالها وجوزها وهي بتصوت .. والنفر اللي جايب لها محضر الجلسه يوجف ع الباب أول ما يسمع الست النايبه بتصوت يتصل بالبيه رئيس المجلس بالاومبايل ويجوله موافجه ياريس ..
ويادار م دخلك شر .. إزيك بجا يابا الحاج أبو الهول ..
أستر ع النايبات يارب …
مجدي المصري