ابو الهول وانا وضرب السياحه

والنبي واحشني علاوليه يابا الحاج أبو الهول ووحشاني جعدتك الحيلويه ..

بجالي مده ما اتحددتش وياك …. الدنيا تلاهي والناس والنبي تعبانيه وعيانيه ومش جادره تتكلم .. بس أني والنبي أول ما فضيت جيتلك دوغري عشان أتحدت وياك

أصل أولت امبارح يابا الحاج ابو الهول الواد سعيد ابن الحاجه أم سعيد اللي بيشتغل في السياحه في الغردجه رجع من الشغل ولما أمه سألته رجع ليه جال لها أصل السياحه انضربت يامه

راحت الوليه شهجانيه وجالت يالهوي اليهود ضربوها زي غزيه ربنا ينتجم منهم وينصر المسلمين عليهم كلاتهم

جام الواد سعيد جايلها يامه دي حاجه تانيه خالص طردوني من الشغل علشان مفيش سواح يامه جامت الوليه أم سعيد جالعه راسها وجعدت تدعي ع السواح ربنا ينتجم منهم .. ربنا ياخدهم .. ربنا ييتم عيالهم .. ويوجف حال السواح ولاد الكلب الكفره دول

جام الواد سعيد سايبلها الدار وطلع جعد علي الجهوه من ساعتها مارجعشي الدار

وبعدين يابا الحاج ابو الهول علشان ما اطولشي عليك الوليه ام سعيد جاتني ال ايه عايزاني أجيب لها "اطر" الجماعه السواح دول يعني حته من هدومهم ولا مؤاخده أي حته انشاله تكون من تحت مش مهم يعني المكان ولا مؤاخذه علشان توديه للشيخ حسونه بتاع العمولات يعمل ليهم عمل علشان الواد سعيد ابنها يرجع الشغل تاني