مواضيع اليوم
ابو الهول وانا واليوم الرياضي
السلامو عليكم يابا الحاج أبو الهول .. أني جايلك النهارديه من البلد خصوصي أصل الناس كلاتها في البلد عمالين يتودودو عليك .. أصلهم ولا مؤاخذيه شافوك في اليوم الرياضي اللي كان عامله البيه رئيس الوزرا صاحبك والنبي يابا الحاج أبو الهول شكلك انت والبيه رئيس الوزرا حيلو جوي وانتم اللتنين "طوال" في وسط البهوات الوزرا الجصيرين في الملعب ولا مؤاخذه الوزير من دولم مش واصل لحد "ركب" البيه رئيس الوزرا
المهم مش حاطول عليك يابا الحاج أبو الهول أصل الناس ولا مؤاخذه في البلد مكلفاني أجولك تعمل حسابهم ف "الاطعام" ولا مؤاخذه واني جايبلك كشف بأسامي أهل البلد نفر نفر
أصل يابا الحاج أبو الهول الواد حسانين ولا مؤاخذه الجربوع.. أيويه هو اسمه الجربوع ..الي عامل غرزه شاي وجهوه ف أول البلد كان حداه في الغرزه جماعه ولا مؤاخذه أغراب عن البلد بيشربوا شاي وجوزيه .. جام الواد حسانين سمعهم بيتكلموا وبيجولوا ولا مؤاخذه البيه رئيس الوزرا حلف يمين انه يخصص تمن تذاكر اليوم الرياضي وفلوس الاعلانات والدعايه لصالح المواطنين الغلابه ولا مؤاخذه اللي هما ضحايا الحكومه وعمايلها .. وكمان جالوا ان ولا مؤاخذه كيديه دخل التذاكر والاعلانات حوالي كيديه كام مريار يعني كيديه بالبلدي كل واحد م الشعب الغلابه ياكل لوحده كيلو لحمه حمرا أي والنبي حمرا من غير دهنه ولا شغت لما البيه رئيس الحكومه يوزع عليهم الفلوس دي كلاتها
بس الناس كلاتها مش مصدجه اليمين اللي حلفه البيه رئيس الوزرا ديه ولا مؤاخذه يعني مش مكدبينه لا سمح الله .. بس بيجولو البيه وزير الماليه خد الفلوس دي وجاب جماعه موظفين حداه بتوع ضرايب ومجعد كل نفر ف ركن ومديله كوم فلوس يعد فيه وبيجولوا ان البيه وزير الماليه حايجول للبيه رئيس الوزرا اللي يعوزه البيت يحرم علي الجامع والوزاره عايزه ياما روح كفر عن اليمين وخلاص وخساره ف جتت الشعب
جامت الناس ولا مؤاخذه جايلين وماله ما هيه كفاره اليمين اطعام ستين مسكين مش مهم لحمه .. بس كيديه عشان الشعب المساكين كله يتطعم ولا مؤاخذه البيه رئيس الوزرا لازم يحلف كام يمين ؟؟
بس سايج عليك حبيبك النبي ما تخلي البيه وزير الماليه هو اللي يحسب حسبه الايمانات دي...... الناس عايزه تاكل .. الطف بالناس يارب
مجدي المصري
التعليقات (0)