ابو الهول وانا والمشتشفي

السلام عليكم يابا الحاج أبو الهول بصراحه كده أني جايلك النهارده وعايز أقعد ف ريحك وأعيط لحد ما أموت م العايط ….هي الدنيا جري فيها ايه الناس اتشال من جلوبهم الرحمه ليه كده ...أمال بس عايزين ربنا يرحمهم ازاي ؟
أني كنت ف مصر بجالي كام يوم ويادوب رجعت البلد امبارح وأول ما روحت الدار ..الاستاذ علي أفندي ابن الحاجه أم علي جارنا في البلد جالي بالليل وجعد يعيط عايط يجطع الجلب راجل كبير محترم زي ديه يعيط العايط ديه كلاته والعياز بالله جطع جلبي … جلتله فيه ايه يا علي أفندي ايه اللي حوصل
جال لي من كام يوم أمي تعبت بالليل وطلبنالها الاسعاف وجت خادتها المشتشفي الاميري .. ولما دخلنا الاستجبال جالولي اجطع تزكره
طب هي "الوليه" ولا مؤاخذه داخله السيما يابا الحاج عشان تجطع تزكره... ما علينا المهم حطوا الوليه علي سرير وسابوها والوليه ياعيني بتتألم والبيه الداكتور ف الاستراحه لامؤاخذيه بيعمل زي الناس ...ساعتين بيعمل زي الناس ..أصله دكتور
المهم يابا الحاج أبو الهول واحد من الجماعه التمرجيه اللي في المشتشفي جال للاستاذ علي أحسن حاجه تاخد أمك وتوديها مشتشفي خصوصي أصل المشتشفي الأميري مافيش فيه علاج ولا دياولوا ولا مؤاخذه كيديه "ون وي" جمت أني سألت الأستاذ علي يعني ايه "ون وي" ديه اسم "دوا" واللا حاجيه .. جام جاللي لا "ون وي" يعني ولا مؤاخذيه تدخل المشتشفي علي رجليك تخرج محمولا علي الأعناق …. لأ يابا الحاج أبو الهول مش ف "مظاهره" لا سمح الله … محمول علي الاعناق يعني ف النعش وانا لله وانا اليه راجعون بس بعد ما يشرحوا الجثه وياخدوا ولا مؤاخذه الفشه والكلاوي والطحال كمان
المهم يابا الحاج أبو الهول الأستاذ علي ما كدبش خبر وخد أمه وطلع جري عالمشتشفي الخصوصي وهناك مفيش حداهم تذاكر والحمد لله بس لازم يدفع الف جنيه تحت الحساب الأول ولا مؤاخذه كده ربط كلام ...الأستاذ علي ما كدبشي خبر .. اتسلف الالف جنيه من الناس ودفعهم ودخل أمه وبصراحه المشتشفي الخصوصي ديه فيه كل حاجه بريفكس ...راحوا عاملين للوليه أم علي تحاليل لنسبه اللحمه في الدم لجيوا حداها نجص شديد ما هيه ياولداه مش فاكره أخر مره كلت فيها لحمه كانت امتي
وبعدين عملولها أشعه علي الضوافر برضك مالجيوش حاجه … المهم يابا الحاج أبو الهول مش حا طول عليك البهوات الدكاتره جالوا للاستاذ علي أمك محتاجه عمليه فورا لحسن حا تموت والبيه اللي بيعمل العمليه ديه بياخد مصنعيه ايده عشر تلاف جنيه غير حساب المشتشفي والدخان والذي منه
جام الأستاذ علي أغمن عليه كالميت ..راحوا حطينه جمب أمه وحطوله محلول عشان يفوج أصل حداه جفاف … المهم مش حاطول عليك يابا الحاج أبو الهول بعد ما فاج ادوله فاتوره ب الف وتلتميه وخمسه وستين جنيه وأربعين جرش تمن ولا مؤاخذه التحاليل والأشعه بتوع أمه وكمان أجره ما فوجوه بالمحلول …. الأستاذ علي خرج بتصرف ف المبلغ طب يجيب منين العين بصيره والايد جصيره والنبي يابا الحاج أبو الهول لو يعرف يسرج كان سرج
الراجل اتجنن ياولداه ودار يلف ع البلد كلاتها يتسلف تلات أيام بلاياليهم وهو زي المجنون داير يخبط ع البيبان ويجول ادوني لله ياناس عايز أعمل عمليه لامي ...المهم يابا الحاج أبو الهول ربنا جدره وجمع تمن تلاف جنيه وجري علي المشتشفي جام البيه الدكتور اللي حايعمل العمليه رماهم في وشه وجاله احنا بنبيع طماطم جاي تفاصل هنا

جام الأستاذ علي طلع علي الجامع ساعه الصلا ونتش المكرفون من ايد الشيخ وجال ياناس أمي بتموت وعايز أكمل فلوس العمليه
ان جيت للحج يابا الحاج أبو الهول الناس كلاتها طيبين وغلابه كل واحد طلع اللي ف جيبه واداه للأستاذ علي
والأستاذ علي جري عالمشتشفي الخصوصي ومعاه ناس ياما من أهل البلد يمكن الوليه تحتاج تبرع بالدم الناس تتبرع بدل ما يبيعوله الدم بالغلا والكوا …. وأول ما وصل المشتشفي البيه اللي جاعد في الاستهبال جاله البقاء لله أمك ماتت وعايزين أجره البياته في المستشفي تلات أيام ستميت جنيه
هي ولا مؤاخذه الوليه كانت بايته ف شرم الشيخ والا مرينه ايه جله الحيا دي وحتما ولابد يدفعهم عشان يستلم جثه امه
نروح لمين يابا الحاج أبو الهول نشكيله … مالناش حد .. هو البيه وزير الصحه ديه مش صاحبك ما تجوله يعمل تسعيره جبريه للبهوات الدكاتره دول وبلاش افتره ومص دم الغلابه وكمان بلغ البيه وزير الماليه صاحبك يحش وسطيهم بالضرايب يستاهلوا ماعندهمشي ريحه الرحمه … حيسبنا الله ونعم الوكيل في الأميري والخصوصي والبهوات الدكاتره كلاتهم

وم تسترشي عليهم يارب

مجدي المصري