ابو الهول وانا واللادار

العواف عليك يابا الحاج ابو الهول.. اصل اني جايلك ولا مؤاخذيه النهارده علي حكايه كيديه حوصلت حدانا ف البلد...

اصل امبارح الصبح بدري والناس كلاتها رايحه ولا مؤاخذه تشوف اشغالها جه ولا مؤاخذه اوتومبيل المرور ووجف ف اول البلد وحط الجراطيس وعمل ولا مؤاخذه "كمين باللادار" لا مش الدار بتاعنا اللادار ديه ولا مؤاخذه حاجه كيديه بتاخد "الاطر" بتاع العربيات اللي بتجري بسرعيه .. يقوم البيه ظابط المرور ولا مؤاخذه كيديه يوجفهم ويكععهم دم جلبهم مخالفات ...فلوس ياما واهو كله رزق ورايح للحكومه

وان جيت للحج يابا الحاج ابو الهول الرزج ديه يحب الخفيه ورزج البدريه ديه كله مخالفات مرور

قمت اني وشويه ناس من اللي كانوا ماشيين رايحين اشغالهم سيبنا اشغالنا وجعدنا جمب الاسفلت ولا مؤاخذه نتفرج

وان جيت للحج يابا الحاج ابو الهول البيه ظابط المرور ديه كان مرزق من اول ما نصب الكمين بتاعه ديه واللادار عمال يلطع ف اطر العربيات والبيه الظابط والبهوات امناء الشرطه يوقفوا العربيات ويكععوا صحابها مخالفات ياما واني والناس اللي قاعدين ويايا كل ما نشوف اللادار بيلدع واحد نجول الله واكبر الطع خلي العالم تتعلم الادب .. الطع

جام البيه الظابط خد باله منينا جام باصص لينا شزرا اي والنبي شزرا وجال جاعد تعمل ايه حداك ياجدع انت وهو …. قمت اني جايله احنا قاعدين مستنيين الجطر

راح البيه الظابط متعفرط وجالي انت حاتهزر ياروح امك... حيلويه روح امك دي

قمت اني قايله ياباشه احنا ولا مؤاخذه انفار بنشتغل ف الغيط والمجاول بتاع الانفار بتاعنا اسمه الجطر ...اصل اني مفتح وفاهم اسلك ازاي ويا البهوات الظباط دولم ...جام اللادار راح لاطع عربيه ..قام البيه الظابط اتلفت وانشغل عنا وراح يوجف العربيه اللي لطعها اللادار

المهم يابا الحاج ابو الهول العربيه دهيا كان جزازها كلاته اسود ف اسود والعياز بالله وديه ممنوع ف جانون المرور … المهم البيه صاحب العربيه فتح الجزاز وجال للبيه الظابط "مستسار" راح البيه الظابط ضاربله تعظيم سلام كيداهون

جمنا احنا كلاتنا اشرابينا نبص علي نمر العربيه الملاكي لجينا مكتوب عليها هيئه قضائيه وبعدين تحت منها ملاكي قريش وبعدين الارقام جمنا احنا جلنا بينتنا وبين بعض الباشا ديه مستسار في محكمه قريش الكليه

المهم يابا الحاج ابو الهول اللادار لطع واحد تاني واتاريه طلع برضك بيه كبير ظابط بوليس ولما اشرابينا نبص علي النمر لقينا مكتوب عليها ملاكي بني خزاعه بس من غير ارقام ….جمنا احنا جلنا الباشا ديه مأمور اسم اول بني خزاعه …... وكمان واحد بيه كبير طلع ظابط جيش بس ديه بقي ماكانش حاطط نمر من اساسه

جمنا احنا جلنا البيه ديه ظابط ف الجيش السري …..... المهمن يابا الحاج ابو الهول مش حاطول عليك احنا كلاتنا فهمنا كيديه من غير مفهوميه ان الكبير كبير ف البلد دي وان البهاوات المستسارين وظباط البوليس وظباط الجيش دولم كبارات البلد

وان قانون المرور الجديد البريفيكس دوان مش بيتطبق عليهم امال ايه ماهومن برضك بهوات كبار ومش جرابيع ولا مؤاخذيه زي حالاتنا ينضربم بالمراكيب ويدفعوا مخالفات ياما تهري كبد اللي خلفوهم...... بس اللي حازز في نفس العالم كلاتها ان لما الحكايه كيديه طب ما عملوش قانون مرور خصوصي ليهم وبرضك يكون بريفيكس وسابولنا احنا الجرابيع القانون بتاعنا ليه والا هيه العمليه اشتراكيه وخلاص ...ديه دي يابا الحاج ابو الهول ما يعملوا قانون مرور للبهوات الكبار وقانون مرور للجرابيع وكل واحد والقانون بتاعه

استر ع الجرابيع يارب