ابو الهول وانا والبلهارسيا

العواف جوت مورجين عليكم يابا الحاج ابو الهول .. امال ايه الحكايه ظاطت ... اصل اني ولا مؤاخذه كيديه جايلك النهارده وعندي حته فكيره تساوي تقلها دهب … اصل امبارح جه حدانا البلد وفد الماني بس وفد مفتخر اي والنبي الوفد كلاته مفتخر كلاتهم ولا مؤاخذه عولما من بتوع البلهاريسيا وجم البلد ف مكروباز مفتخر ومتكيف وجه وياهم وفد علما برضك بس مصريين محلي الصنع يعني … وجم ف عربيه نص نقل مأجرينها من موقف الضواحي وراكبين ف الصندوق الوراني في الهوا الطلق بياخدوا ولا مؤاخذه حمام شمس عشان يموتوا البراغيت اللي هاريه جتتهم
المهم عشان ماطولشي عليك يابا الحاج ابو الهول الجماعه العولما دولم كانوا جايين البلد يعملوا ابحاث علي البلهاريسيا اللي ف ولا مؤاخذه الترعه .. بس لما نزلوا البلد مارضيوش ياكلوا ولا يشربوا ايتها حاجه حدانا اصلهم ولا مؤاخذه كانوا متعقمين …. المهم يابا الحاج ابو الهول خدناهم التيرعه يعملوا ابحاث براحتهم وزمبهم علي جمبهم .
المهم طلعوا من المكروباز بتاعهم شبك كيديه ولا مؤاخذه يصطادوا بيه القواقع بتاعه البلهارسيا .. وفجاه واحد منيهم راح سارخ بالالماني وقعد يشاور علي جسر التيرعه .. قمنا حنا كلاتنا بصين علي جسر التيرعه لقينا الواد مسعد ابن الوليه ام مسعد قاعد ولا مؤاخذه بيعمل زي الناس وناسي روحه خالص ومخلي الحته كلاتها روايح … ايوه من اللي انته عارفها … قمت اني كاشش في الواد مسعد عشان يختشي .. قام واحد م الجماعه العولما الالمان قايللي بالالماني سيبه علي راحته .. الواد مسعد ديه هو البلهارسيا بعينها وحايخدوه معاهم المانيه يعملوا عليه ابحاث هناك .. ايوه المترجم جاللي كيديه وجاللي كمان البلهارسيا مقطعه كبده ومصارينه كمان … قمت اني قايلهم الواد مسعد ديه قطره من غيث … الشعب كلاته عنده بلهارسيه وجفاف وتقوس … لا مش تقوس في الساقين .. تقوس في الظهر يعني كيديه ولا مؤاخذه انحناء الضهر نتيجه والعياز بالله كتره الامراض وسوء التغذيه والشقي والتعب وكمان الهم وجله الدخل … الفلوس يعني
المهم يابا الحاج ابو الهول مش حاطول عليك .. انت البهوات العولما الالمان صحابك كلاتهم .. ماتكلمهم ياخدولهم اد كيديه مليون والا اتنين مليون نفر زي حالات الواد مسعد يعملوا عليهم ابحاث للامراض اللي ف الدنيا كلاتها
لا ما تخافشي ع العيال دولم .. دول عيال عفاريت اول ما حيحطوا رجليهم ف المانيه حايجروا علطول ويطلبوا حق اللجوء الصحي لالمانيه بالامراض اللي حداهم اي والنبي المفوضيه العلييه لشؤون اللاجئين الصحيين اللي ف شارع نيتشيه ف شتشجر بتاعت المانيا احنا حدانا العنوان .. اول ماحاتشوف اشكالهم حاتديهم حق اللجوء الصحي من غير نقض ولا ابرام وبعدين بعد كيديه العيال دولم حايشتغلوا ف المعمار الالماني ويجيبوا فلوس ياما …. ومنه برضك يوفروا ع الحكومه لقمتهم اللي تاعبه الحكومه … مش احسن ما يركبوا البحر والمراكب تغرق بيهم ويموتوا والسمك ياكلهم ويجيله بلهارسيا ..... مش كيديه والا ايه يابا الحاج ابو الهول
استر ع البلهارسيا يارب