ابو الهول وانا وزياره رئيس الوزرا

السلامو عليكو يابا الحاج أبو الهول …. أني فرحان فرحان جوي النهارديه أصل البيه رئيس الوزرا كان حدانا في البلد إمبارح ...لا مش فرحان بالبيه رئيس الوزرا … أني فرحان باللي حوصل حيدانا في البلد ..
أصل يابا الحاج أبو الهول من كام يوم كيديه والبلد كلاتها مجلوبه رأسا علي نقب والناس مش عارفه السبب … البيه المأمور والبهوات الظباط كلاتهم والبهوات المخبرين كلاتهم دايرين في البلد ليل نهار يأفشوا في الطفاطف والعيال الحراميه والعيال المشبوهيه حتي الواد حسانين الجعر بتاع المخدرات أفشوه ..
إن جيت للحج يابا الحاج أبو الهول ساعه ما أفشوه ماكانش معاه مخدرات .. مش مهم المهم هما يأفشوه والحشيش من حيداهم أمال إيه الناس لبعضيهم ...حتي الغرزه اللي ف أول البلد بتاعه الواد الجربوع أفشوا الجماعه المساطيل اللي جواها وكسروهاله
لا و اللي أحلي إن البيه رئيس المدينه زات نفَسه والرجاله بتوعته كلاتهم دايرين في الشوارع ليل ونهار ينضفوا ويكنسوا ويشيلوا الزباله ويدهنوا لرصفه ويشيلوا الاشغالات ولامؤاخذه أي وليه فارشه بشويه لمون يضربوها ويمشوها ...لحد ما البلد بجت بريفكس أي والنبي بريفكس مفتخر كمان ..
ده حتي البيه رئيس المدينه جاب جركن شامبو م المفتخر أبو ريحه وإداه للعمال يغسلوا بيه الشوارع علشان ريحتها تبجي حيلويه .. جوم إيه العمال خادوه وإستحموا بيه ف النافوره وبجت ريحتهم حيلويه ..
المهمن يابا الحاج أبو الهول مش حاطول عليك احنا عرفنا كيديه من مصدر متوسق بيه إن السبب في ديه كلاته ان البيه رئيس الوزرا جاي حدانا البلد يفتتح التيرعه العمومي أصلها كانت مقفوله إيام السده الشتويه والفلاحين ماكانوش لاجيين ميه يسجوا بيها الفول والغله ..
المهمن مش حاطول عليك يابا الحاج أبو الهول .. لما البيه رئيس الوزرا جه حدانا في البلد الناس المهابيل جريت في الشارع فاكرين إن البيه رئيس الوزرا جاي يفرج إطعام للمساكين كفاره للايمانات اللي داير يحلفها عالعمال والبطال للشعب ..
وكل واحد من الناس المهابيل شايل في ايده ماعون كبير ياخد فيه الاطعام ولامؤاخذه ...ولما البيه رئيس الوزرا فات في البلد كان جافل جزاز العربيه يعني بالصريح كيديه مارماش ولا رغيف للشعب ..
قامت الناس اتكسفت علي دميها وروحت وهي بتطبرطم وتقول يمكن البيه رئيس الوزرا أطعم ناس تانيه نستني اليمين الجاي وخلاص ..
المهمن مش حاطول عليك يابا الحاج أبو الهول .. والناس الأكابر كلاتها واجفه عند فم التورعه كان واقف في وسطيهم الاستاز وطني بتاع الحيزب اللي في البلد وكان لابس الحته السكروته اللي حيلته وحاطت ولا مؤاخذيه جِل علي شعره وأول ماشاف البيه رئيس الوزا هالل من بعيد .. مسكته النداهه وجعد يهتف ويجول بالروح بالدم نفديكي ياتيرعيه .. بالروح بالدم نفديكي ياتيرعيه والناس تسكت فيه وهو لايونكن ابدا لحد ما اغمن عليه كالميت جام العمال بتوع مجلس المدينه شالوه وحطوه جمب الحيط أصل ماحدش كان فاضيله وجتيهه ..
المهمن يابا الحاج أبو الهول مش حاطول عليك احنا كنا جاعدين ويا الشيخ سماعين … لا مش بتاع الاوجاف ..الشيخ سماعين ديه بتاع ربونا والناس سألته عن أيمانات البيه رئيس الوزرا ديان ..
جام الشيخ سماعين جايل الشرع بيجول ان البيه رئيس الوزرا يحج له تلات ايمانات بس ..بعد كيديه الوزاره تتحرم عليه ولا يونكن يرجع ليها تاني الا لو جاب ولا مؤاخذيه كيده محلل ..
الشرع بيجول كيديه وكمان لايجوز كفاره عن أيمانات رئيس الوزرا
بتاتا ..
طب يابا الحاج ابو الهول الناس تجيب محلل للوزاره منين بس
أستر علي الوزاره يارب
مجدي المصري