مواضيع اليوم
ابو الهول وانا والمرور والتكاتك
الحج يابا الحاج أبو الهول الحج....يافرحه ماتمت خادها الغراب وطار.. الناس عماله تدعي عليك يجيلك ويحط عليك يارب....انت السبب
يابا الحاج أبو الهول فاكر لما جيتلك هنا في الحته اللي ما غيرهاش ربنا دي؟ وكلمتك عن المدعوج "الطف طف" فاكر!!! .. جمت انت بحسن نيه أصلك زي حالاتي طيب وقلبك أبيض زي ورج الخس .. كلمت الباشا وزير الداخليه صاحبك والحج يتجال الراجل ما كدبش خبر راح مكلم البهوات بتوع المرور وجال ليهم عيب عليكو الكلام ديه اعملوا رخص للمدعوج الطف طف
جوم ايه يابا الحاج أبو الهول البهوات بتوع المرور ما كدبوش خبر وهبوا "هبه رجل واحد" أي والنبي يابا الحاج أبو الهول هبه رجل واحد وداروا "يأفشوا" في الطفاطف اللي في البلد كلاتها … ان جيت للحج يابا الحاج أبو الهول الناس افتكرت في الأول ان الجماعه المشايخ جالوا ان "الطف طف" ديه منكر والعياز بالله وبعدين الحجيجه بانت أصل البهوات بتوع المرور جالوا للناس .. المدعوج الطف طف ديه حتما ولابد يترخص جامت الناس جاليه ومالوا برضك مش عيب نرخص هو احنا صغيرين والا احنا صغيرين
جام البهوات بتوع المرور جايلين للناس لازم الاول "الامن والمتانه".. في الأول يابا الحاج أبو الهول الناس افتكرت "الأمن والمتانه" ديا اداره تبع الداخليه بس في مصر وكل نفر شال تحت باطه ورج الطف طف وجعد يلف يسأل علي علوان الأمن والمتانه لحد ما واحد من الجماعه الطيبين بتوع المرور فهمهم ان ديا ولا مؤاخذه حاجه كده "ستره" للطف طف حتما ولابد كل واحد يستر بيها علي الطف طف بتاعه علشان يرخصهوله
والستره دي يابا الحاج أبو الهول ولا مؤاخذه بالبلدي كيديه ازاي يعني ….لابد يشيل الغطا المشمع الأول وبعدين يركب بداله غطا ولا مؤاخذه "فبر" من اللي بيتكسر وكمان لازم يركب في الطف طف حزام أمان وبعد كيديه يابا الحاج أبو الهول لازم يسد الجنب الشمال كله وده برضك مصلحه ربنا يجعلنا من أهل اليمين وحتما ولابد ولازوما يشيل الاكصدام وكمان يشيل التسجيل ابن الكلب أبو صوت عالي اللي جرف البلد كلاتها وكمان يحط طفايه حريج في الطف طف
طيب يابا الحاج أبو الهول ولا مؤاخذه هو الراجل صاحب المصنع بتاع "الفبر" اللي بيتكسر ديه غلبان وصاحب عيال وعايز ياكل عيش علشان كيديه البهوات بتوع المرور حكموا رأيهم ان لازوما الكل كليله يركب الفبر اللي بيتكسر بتاع الراجل ديه؟؟؟؟؟
وكمان يابا الحاج ابو الهول الجماعه بتوع المرور بيبيعوا طفايات الحريج والناس بتجول ماشي برضك صحاب عيال وعايزين ياكلوا عيش .. وبعدين يبيعوا فبر من اللي بيتكسر كمان !!!!!! يبقي برضك لازم يراعوا الناس ولا مؤاخذه ويرخصوا سعر الطفايات والفيبر يعني اتنين في واحد زي السوبر ماركت بتاع مصر مش كده والا ايه ؟؟؟؟؟ده الناس صحاب عيال برضك
مهومن برضك بيبيعوا حزام الأمان ودي بتشيل دي يابا الحاج أبو الهول والناس لبعضيها والا ايه؟؟؟؟
وكمان يابا الحاج أبو الهول محدش جال للناس الجنب الشمال ده يتسد بايه ؟ ممكن يعني الناس تجيب طوب وتبنيه وتسيب طاجه صغيره تنور ؟؟ والا فيه واحد تاني غلبان وصاحب عيال وعنده مصنع بيعمل الجنب الشمال ديه وعايز ياكل عيش؟؟؟؟؟
ونفسي اجولك يابا الحاج ابو الهول ربنا يكفيك شر مرواح المرور لاي سبب كان
ديه حاجه كيديه والعياز بالله يقولولك روح هات نموزج معرفش ايه وبعدين كمان نموزج معرفش اسمه ايه وكمان وكمان لما يتخرب ولا مؤاخده بيتك من تمن النمازج دي … لا والاكاديه انهم كمان يجولولك هات ولا مؤاخذه وصل طفايه وانت معاك الطفايه أه ما انت فلوسك كتير ابو الهول بجي وبعدين يبصوا في اللوحات كده ويمصمصوا في شفايفهم ويجولولك جصيره شويه والا طويله حبتين روح هات نموزجين تاني وبعدين سلم النمر … يانهار اسود هي النمر مش طاهره والا ايه؟؟؟
وبعدين يبيعولك نمر تانيه من حداهم طاهره و نضيفه طب م هما اللي باعولك النمر الاولانيه!!!!!!!
وكمان يابا الحاج اخونا بتوع المرور عاملين جمعيه صندوج يعني بناتهم كيديه ولا مؤاخذه اسمها التكافل اي والله التكافل وانت لازم تتكافل معاهم امال ايه الناس لبعضيها مش كفايه المخالفات اللي بتجطم الضهر لازم تتكافل مع البهوات
والنبي تنورني يابا الحاج أبو الهول ما انت صاحب الاكابر كلاتهم ….. لا والاكاده يابا الحاج ابو الهول لما العجل بيجع بتكتر السكاكين …. عارف "المحليات" كمان لجيتها سبوبه جامت ايه جالت "نسترزج" احنا كمان ….حتما ولابد ولازوما اللي يرخص الطف طف بتاعه ييجي حدانه ويرخص "خط سير" …. اني مش عارف يعني ايه خط السير ده يمكن "سير وسلوك" يعني؟؟؟ الله واعلم ويستر علي ولايانا
برضك المحليات تحصل رسوم والذي منه …."سبوبه" يابا الحاج....سبوبه وانت السبب
استر علي الناس يارب
مجدي المصري
التعليقات (0)