ابوالهول و الكفار

ابوالهول و الكفار ..
إيوه ايوه .. آني عرفت هلوجتي إنتَ محدش شافك ف التحرير ليه ..
أتارنك طِلِعت من جَبيله اللات والعُزه أكيد إنت خالك هُبل ..
إيويه كُت خايف م الناس ل تسيب السَوْره وتجري وراك تحطم لصنام ..
بس السَوْره نجَحَت , إيوه نجَحَت وشالَت الريس حسني مبارك ورجَعَتنا تاني جبايل , إيوه جبايل وكل نفر عِرف جبيلته والناس هلوجتي ف بر مصر بَجَت مُسِلْمين وكُفار , ونشاءالله ربُونا ح يُنصر المُسِلْمين ع الكُفار ..
شوفت جبيله جِنا لما البيه عصام أبو شرف عينلهم مُحافظ ولامؤاخذيه كافر ..
جبيله جِنا هبوا هبه رجُل واحد , إي والنبي رجل واحد وجطعوا طريج القوافل اللي رايح ع لوجصر واسوان وكمان جطعوا السيكه الحديد ومفيش نفر يمر ومفيش سياحه ولا دياولو واللي عاوز يروح أسوان ياخدها عوم ف النيل وكمان بينتخبوا أمير ليهم هلوجتي بدل المحافظ ..
وجالوا "يا مشير فينك فينك الكفار بيننا وبينك"
طب المشير والجيش ماله والنبي , طب ده الجيش المصري ديه يوم سته أكتوبر هجم ع اليهود وحطم خط برليف والعالم كُلاته بيتحاكا بيه , هلوجتي الناس خلت الجيش ديه زي المعلم حنفي بتاع نورماندي تو , إيوه لما كان بيجول أنا كلمتي لا ممكن تنزل الأرض أبدا والآخر جال تنزل المره دي ..
طب والنبي الجيش ديه ح يحارب اليهود إزاي تاني ..؟
ما علينا هلوجتي كل جبيله تعمل لنفسيها جيش وكل نفر لازم يكون حيداه فرس أوناجه وسيف ورمح , إيويه والجبايل تحارب بعضيها ويبجي فيه غنايم وأسلاب وسبايا وبكديه ما يكونشي ف بر مصر بطاله علاوليه ..
وبدل م يكون فيه محافظ يكون شيخ الجبيله ..
لا .. القاهره ح تتجسم جبايل , خد عندك جبيله إمبابه وجبيله شوبرا وجبيله الموسكي وجبيله لالف مسكن ..
لأ .. مصر الجديده ح تجوم عليها حرب بين جبيله العباسيه وجبيله المطريه أصل فيها غنايم وموزز سبايا بالهبل ..
إيون هو أحسن حل للبطاله إن الجبايل تحارب بعضيها والشباب كُلاته كل نفر يحارب ويا جبيلته ..
ومنه رضوان أفندي وزير الماليه ما يُجعدشِ كل شويه يجول حيدانا عجز ف الميزانيه عاوزين كام مريار نِسد بيهم العجز ويدور يشحت م الدول التانيه وسندوج النجد الدولي يبهدل فيه ..
إيويه م الغنايم ولسلاب يسد العجز ف الموازنه ويسد ديون مصر كمان ..
المُهمَن هلوجتي يابا الحاج أبو الهول بعد ربُنا م ينصر المُسِلْمين ع الكُفار بتوع مصر ح نعمل إيه ..؟
آني بجول الجبايل كُلاتها تتوحَد ويا بعضيها وتروح تحارب كُفار الصين , إيويه مش همن بيعبدوا اللات والبوزه يُبجُم كُفار ..
أي نعم همن بيوردولنا سجاجيد الصلا والسبح والجلاليب الجصيره والطويله والسراويل والحجاب والنجاب والعرايس الصيني وكافه شي .. بس برضك كُفار وواجب علينا نحاربهم ..
أي نعم هُمْن مريار وربعميت ماليون وممكن ياكلونا بسنانهم بس لازم نِجاهد فيهم والا إحنا بنجاهد بس ف كُفار مصر اللي طايلاهم إيدينا ..؟
إلا جوللي يابا الحاج أبو الهول مش العرايس الصيني دولم كُفار , اُمال بنتجوزهم إزاي , هوّن ديه ينفع شرعا ..؟
أستر ع البلد كُلاتها يارب ..
مجدي المصري