إعدام الأسود في مصر !..

تكاثرت الأسود بحديقة الحيوان بالجيزة حتى بلغ عددها (47)  أسداً يتكلف إطعامهم سنوياً نحو 2،1 مليون جنيه ..

وقد جربت إدارة الحديقة عدة طرق للتقليل من معدلات التكاثر المختلفة لأسود الحديقة،

 ومنها تقديم "حبوب منع الحمل " لإناث الأسود .. وفشلت هذه التجربة،

وكذلك حاولت إدارة الحديقة استبدال أسودها بحيوانات أخري مع حدائق الحيوان العالمية، لكن هذه الطريقة فشلت أيضاً.
وأخيراً تقدمت الحديقة بطلب إلي «أمين أباظة» ــ وزير الزراعة ــ لإعدام الأسود الزائدة عن الحد المطلوب مع الإبقاء علي خمسة منها علي أقصي تقدير،

وحتى الآن لم يبد «أباظة» رأيه في هذاالطلب.
بينما إدارة الحديقة تستعجل الموافقة علي طلبها .. خاصة مع ازدحام أماكن إقامة الأسود، وتزايد معدلات تكاثرها، حيث تستقبل الحديقة ما يقرب من 5 أشبال كل شهرين ..
كان هذا هو الخبر الذي ورد بجريدة الدستور المصرية ..

وليست الطرافة في الخبر بقدر ما كانت في تعليقات القراء "المصريين" الذين أمطروا الخبر بتعليقات ساخرة ساحرة .

تعليقات من النكهة المصرية الخالصة المغلفة بالابتسامة المريرة واللفتات الرائعة ..

ومن نماذج تلك التعليقات

( أقترح..أن يرسلوا تلك الأسود  إلى مجلس الشعب وبالذات إلى أعضاء الحزن الوطني وسوف يتحقق أمرين .. إما الأسود يجيلها تسمم من لحوم الأعضاء وتموت..  أو نكون تخلصنا من الحزب) 
                            وتعليق آخر..

(المفروض نسيب الأسود على الحكومة..  هايكون هناك  احتمالين ..  الأول ممكن الأسود تأكلها ... والتاني تزود النسل معاهم ... ويارب الأسود تعمل الاثنين...  طبعا الأسود هي الدكر "الذكر" )!!..
                          وتعليق آخر ..

(حسبي الله ونعم والوكيل..  فعلا الأسود لازم تنعدم في زمن الأرانب اللي احنا عايشين فيه)..
                          وتعليق آخر..

(يا الله على التخلف .. حطوا الذكور فى قفص والإناث فى قفص تانى ..

مش معقولة مفيش واحد فى حديقة الحيوان بيفكر) ..
                       وتعليق آخر:

(ضعوهم فى أمانة الحزب الوطني عشان نشفى غليلنا شوية)!!..
                       وتعليق آخر:

(طبعا عايزين يموتوا الأسود علشان ينفردوا باللبؤات ) !!!..
                      وتعليق آخر ..

(مشكله عويصة فعلا بس أما باقترح شوية حلول:
1- ممكن حكومتنا الرشيدة تستخدم الأسود فى مواجهة الوقفات الاحتجاجية .. وأهو منها الأسود تأكل من غير ما تكلف الدولة مليم احمر.... ومنها القضاء على القلة المنحرفة ....ودعم الأمان والسلم الاجتماعي وضمان سيولة حركة المرور .....أما إذا فشل هذا الاقتراح لاعتراض جمعيات حقوق الحيوان العالمية بسبب رداءة لحم المصريين وما يحويه من أمراض ....

فليس أمام حكومتنا إلا احد الاختيارين التاليين
2- يشحنوا الأسود فى قطار الصعيد بزعم إقامة حديقة حيوان فى الجنوب ويولعوا فى القطر ..
3-يشحنوهم فى عبارة السلام رقم "4" بزعم الإهداء لحديقة حيوان فى بلد شقيق وطبعا الأخ ممدوح عباس عارف هيعمل إيه ويمكن كمان الحكومة ينالها من التعويضات جانب..
                                وتعليق آخر ..

(المعروف إن مفيش زرافه في جنينة الحيوانات ....فبدل ما يقتلوا الأسود الزيادة عندهم ...يكتبوا علي القفص من بره بيت الزرافة ... وأنا متأكد إنهم ها يعرفوا يقنعونا انه زرافة بجد زي مابيقنعونا إن البلد حالها زي الفل ومفيش أي مشاكل عندنا)!!!
                              وتعليق آخر:

(إيه................
فيه إيه؟؟؟؟؟؟؟؟؟؟؟؟؟؟؟؟؟؟
انتوا ناسيين إن الأسد يبقى ملك الغابة.... يعنى حاكمها
وأما انتوا بتعرفوا تعدموا الحكام قاعدين ليه ان شاء الله؟؟؟؟
مستنيين لما الحكام يقضوا علينا واحد ورا الثانى....والله حراااااااااااااااام
بقى إنتي ياحكومه بتوكلوا الأسود لحمه ب2 مليون جنيه ف السنة!!
يا ريتنى كنت أسد...............
كفاية عليكم كداااااااااا أنا ممكن اكتب كتير بس لو عارفه إن فيه ناس بتحس
على فكره أنا موافقة على رأى الصديق اللي بيقول نضع أسد على كل صندوق ف الانتخابات بدل القضاة
عارفيييييين ليه؟؟؟؟؟؟؟؟؟؟؟؟؟؟؟؟
علشان اى واحد أهبل يدلى بصوته لعضو من الحزب الأسد يأكله ساعتها بس يمكن البلد دي تنضف)
                             لا تعليق ..............................