ظلي اللي خذا منـي قليـل الكثيـر
كنت اراعيه يوم امشي سواة ولـدي
التفت له وهو يمشي وراي ويسيـر
مثل طفـل بخطـوة والـده يقتـدي!
كنت امامه بصير وكان خلفي ضرير
يلتمس خطوتي وبصوتهـا يهتـدي!
واتخير له الدرب الهويـن اليسيـر
واتجنب عن الدرب الصعب واحتدي
كنت امهد له الديباج تحت الحريـر
لو تكلفت في راحته فـوق جهـدي!
كل ما اكبر تمنيت ان ظلـي كبيـر
وان ترديت مـا ودي يسمـى ردي!
ما ربطنا سوى الغاية ونفس المصير
هكذا كنت انا ويـاه مـن مولـدي!
لين شمس النهار وقرصها المستديـر
مالت وجابته قبلـي وكـان بعـدي!
قصرتني وانـا والله مانـي قصيـر
طولتني مع الاصحاب مـدة يـدي !
هكذا صحبة اصحاب الرخا يا سمير
تنتهي فا الظلام وفا الضيـا تبتـدي!
بس قل للظلال اللي تمايـل عصيـر
ان وجه الزمان اغبر وكفـي نـدي!
واني بخيـر والدنيـا تراهـا بخيـر
وان ليل الشدايـد ماهـو بسرمـدي
وانت يا ظلي اللي تحسب اني صغير
كم سبقتك وانا جالس لو انت تعدي!