مواضيع اليوم

أم رزق تفتح مخزون ذاكرتها، لتنير دروب قرية كفر عانة

غازي ابو كشك

2009-03-05 07:26:56

0

أم رزق تفتح مخزون ذاكرتها، لتنير دروب قرية كفر عانة

 

الموقع والمساحة والسكان:

تقع قرية كفر عانة شرقي مدينة يافا على رقعة مستوية من الأرض، وربما يعود مصدر الأسم الى قرية عونو الكنعانية. حتى عام 1945 كان عدد سكان القرية ما يقارب 3020 منهم 220 يهودياً. امتلك اهالي القرية ما مجموعة 2214 دونماً مخصصاً للحمضيات والموز، و11022 دونماً للحبوب، و597 دونماً مروياً او مستخدماً للبساتين.

 

 

من مخزون ذكرياتها حدثتني ام رزق: الحياة والزراعة.

كانت الحياة منيحه وكنا مبسوطين، كنا نحصد، نقلع، ندرس، نضمّن بياراتنا ونوكل، بياراتنا ضمّناهم قبل ما طلعنا، تركنا البرتقال في الحوش، مقطوع وجاهز حتى نحطه بالصناديق، والله برتقال دار عمي ضل على أرضه.

النسوان كانت تشتغل مع جيزانها بكل مكان، انا بقيت ازرع بندوره، خيار، ملفوف، وبرتقال وكنت افلح واحرث، انا كنت وحيده لأهلي، اشتغل كل شي لحالي، اقوم من الصبح وارجع المغرب على البيت.

مره اجا واحد عنا على كفرعانا يركّب بابور ويعلمني عليه، قاللي وين اخوك، قلت له انا ما عندي  اخوه وابوي ما بعرف، صار يعلمني على البابور وعلى كل برغي. كان عمري يمكن 15 سنة، كنت ادير البابور وادير المي على الشجر واسقي، اكشبر، اركع (..).

قبل التهجير كنت متزوجة، انا اكبر من زوجي بثلاث سنوات، أولادي وصفية وفوزيه ورزق وفخرية ولدتهم بكفر عانة.

تستمر ام رزق في حديثها عن دورها في الزراعة والإنتاج بلهفة:

كنا ننزل على الأرض بعد ما نولد وابننا على ظهرنا ونطلع نحصد، ابننا بظهرنا ونقطع برتقال، كنا ننيم الولد تحت الشجره ونشتغل، نعمله خيشه وننيمه تحتها حتى ما يبرد، ولما كان الطفل يصمّت، كنا نجيب شوية سمقة حمراء (تراب احمر) وندهنه فيه ويصبّح ولا في اشي عليه. أولادي ولا مرّه حطيت لهم بودرا أو دوا او أي اشي تاني، بس التراب.

 بعد ما رحلنا على اريحا ولدت ثلاث أولاد، والله كنت اطلع على روس الجبال واجيب السمقة وافرشها وانخلها وأحطها على الولد، يصحى ما فيه اشي. هاي السمقه حنونه على الأنسان مثل ما هي حنونة على الشجر.

 

مدرسة كفرعانة:

كان في القرية مدرستان: احداهما للبنين وأخرى للبنات. كانت مدرسة البنين التي أسست عام 1920، تمتلك 22 دونماً من الأرض؛ وكان فيها 270 تلميذاً في سنة 1944. اما مدرسة البنات، فقد انشئت عام 1945، وسجّلت فيها في تلك السنة 57 تلميذة.

عن المدرسة حدثتني ام رزق  مبتسمة:

كان في مدرستين وحده للاولاد ووحده للبنات، لليوم بعدها المدرسة مش مهدوده واولادي تعلموا فيها. أبوي ما خلاني أروح على المدرسة لأني كنت مسؤوله على الفلاحه، كنت اروح اشد على البغله، وآخذ نسوان ابو زلمتي التنتين، هم يقلعوا سمسم وانا اربّط وراهم، اعبي العرباي واطلع اديرها على البيادر وارجع القاهم مساويات النقله الثانيه، نربطها ونروّح.

 

نسوان اليهود مشلّحات ونسوان العرب لابسات

كان اليهود ييجوا على كفرعانة، وكانت اراضينا وبياراتنا جنب بعض. واحنا كنا نروح على بيوتهم ونشتغل عندهم ونورّد عليهم تبن.

نسوان اليهود كانوا دايما مشلّحات وبالكلاسين والنسوان العرب لابسات، ما همّ اجانب!، بس كنا نلعب معهم على البحر وعلى الشط.

كنت اروح تل ابيب ويافا راكبه على الجمل لحالي، اعبي تبن واروح عليهم، اطق على الباب، افسخ الحمل واقيم الأكياس، اعطيهم ويعطوني حقه واركب الجمل وارجع.

كانت النسوان اقطع من الرجال ولا حدا يسترجي يوقفلنا بالطريق، احنا زلام، ومن يوم ما خلقنا النسوان الفلسطينية اقوى من الرجال، اه والله.

مره واحد ضرب علي حجر صغير، رجعتله ومسحت الأرض فيه ودقيت فيه بالكندرا وقلت له والله لأبعت لأبوك، هو اليوم موجود معنا بالمخيّم. هون بالمخيّم بنات بيت نبالا وبيت طريف لما تصير طوشه يصيروا يحطوا الحجار بحجورهم ويتناولوا ويعطوا للرجال، واحده تروح تملي وواحدة ترجع. اليوم الرجال بخافوا يتزوجوا من بنات بيت نبالا لاجل رجم الحجار.

 

نساء كفر عانة يخبزن للثوار

الانجليز اوسخ من اليهود، كانوا ساكنين بالعباسية، فظعوا فينا، بالاخر صار كل شعب فلسطين ثوار، كانوا يوقفوا خارج البلد على البيارات يدوّروا على الثوار، لانهم بعرفوا انه الثوار ما بدخلوا على الدور.

النسوان كانت تخبز وتعجن وتبعت الاكل للانجليز، بذكر يجي المنادي وينادي: يا بنات اللي عندها مروّه تحضر اكل وتبعته على دار ابو خالد؛ كل واحده تسوي اللي قدّرلها ربها. بذكر مره اجوا الانجليز على البيادر وواحد من الثوار نطّ بالبركة وصار يغطس ويطلع ويغطس ويطلع لحتى راحوا الانجليز

 

اليهود تقصف والمسلحين على الشجر

اهل البلد كانوا مسلّحين، اللي عنده ذهب لزوجته كان يبيعه ويشتري باروده، طيب باروده بتقنع دبابة ؟؟ .

لما اجو علينا اليهود بدهن يطلعونا على البيادر حتى يفتشوا الدور ويشوفو اذا في سلاح او لا، كان في امرأة من كفرعانة داخل بيتها عم تولد والجنين كان نصه تحتها ونصه ببطنها، اجوا اليهود وبدهن يطلعوها، قالت لهم: بس اولد بطلع، قال لها: لا، قالت له: مش طالعه واللي بدك اياها اعمله؛ بالاخر استنّوها لحتى ولدت، وربطت الطفل وحطّت الأخت (الرفيقة) معه وطلعت معنا على البيادر، هذا بجوز من ربنا؟ لا ما بجوز.

بعد ما فتّشوا وما لقيوا المسلحين والسلاح، طلعوا من البلد، واحنا روّحنا على الدار، لا حول ولا قوه الا بالله العظيم، دارنا كانت مقلوبة قلب، ولا اشي مع اشي.

بعدها صارت اليهود تقصف البلد بالدبابات والمسلحين يطلعوا على الشجر؛ كان عنا شجر برتقال طول هالبواب، صاروا يتخبوا بالشجر من فوق ويضربوا بالمرتين (نوع سلاح) على الدبابة، هاي الدبابة اجت علينا من العباسيه ووقفت على البيادر، في واحد (تضرب بغضب على ارجلها)، شفته ممد قدامي، هو من دار ابو رقعه من سلمة، كان يحارب بكفرعانة، صارت الناس تقول له: يا ابن الحلال ارجع، يا ابن الحلال ارجع، ما رضي يرجع، بده يموت، الدبابة على البيادر قباله، ضرب عليها اول طلقه والثاني وقفت الباروده، الخنزير(المقصود الصهيوني) عرف انه الباروده وقفت، قام دحَل عليه وقتله؛ بعد حوالي اسبوعين اجت عائلتة، قلنا لهم: حطّينا الجثة بالفستقيه، يعني قبر او غرفة للميتين، لما اجو عليه يطلعوه، شاهد الله، كان بعد وكأنه اليوم ميت، ايديه مثل الحرير؛ قاموه وقعدوه على الكرسي بالسياره وجللوه، مرته قالت: حّلوا الكشاط عنّه، بعد ما حلّوه لقينا المصاري اللي كان شايلهم عشان يروح ع الحج. طالوا المصاري عنه، واخذوه على سلمه
لما  صار القتل فينا، صاروا يضربوا البارود على الناس اللي جوّا واللي برّا، وصارت يا خالتي الطريق زي الزبيب من الجثث، كلهم شباب اشي متجوز واشي اعزب، اشي بالجوّر واشي بالاستحكامات، كنا نطلّع فيهم واحنا مارقين، مش قادرين نقيمهم، لانه الشباب كلها طلعت وبس النسوان بقيت. كيف بدنا ندفنهم؟، صارت النسوان تتسلل بالليل ويقيموا فيهم ويحطّوهم بالفستقيّة فوق بعض. صاحيتها مثل ما انا صاحي اسا.

 والله ابن درويش انقتل واجريه عالقة فوق بالشجرة وراسه لتحت وهو ميت، بعدين طالوه وقبروه. ابن الحاوي انقتل باب داره، وامه انقتلت جوا الدار.

 

الرحيل وسقوط الدولة الثامنة

لما طلعت من كفرعانة، طلعنا على البيارات اللي بينا وبين اللد، بيّاره كفرعانة. انا لما طلعت كان عمر بنتي اسبوع، ودمي بهّر على اجريي وانا ماشي، لبّسوني ثوبين وشلحتين، نمنا بين الشجر. ابوي قال بدنا نروح على اللد، قلت له: ما هي اللد لاحقها الوكر، قال لي: لا يابا احنا هلكيت منرجع، ساعة زمان بس يطلعوا اليهود، هو في يابا حدا بقدر يوخد الدوله الثامنة، سألته: يابا شو هي الدولة الثامنة؟، قال لي: مدينة اللد اسمها الدولة الثامنه، لانها قوية وما حدا بقدر يدخلها. قلت له: يابا اول ما راح تروح هي الدولة الثامنة، اذا بدك تروح الله يسهل عليك، راح ابوي على كفرعانة وفك البابور وراح على اللد، واحنا ضلّينا طالعين على بيت ريما، وبعدها ابوي لحقنا؛ خلاااااااص ما دام رحنا على بيت ريما يعني تركنا ال 48.

سكنا بالجبال في قضاء رام الله، وسكنا حوالي اربع، خمس سنين في عابود، اصل امي من هناك، بس انا ما كنت اعرف اهل امي.

احنا يا خالتي طلعنا ثلاث مرات، الأولى من كفرعانة وبعدها طلعنا من الجبال وبعدها بال 67 طلعنا من أريحا.
الاعتداء على نساء كفرعانة

حاول الجنود يعتدوا على بنات كفرعانة، قمنا هجمنا عليهم وصرنا نرجمهم بالحجار حتى اطلعناهم من البيت، كانوا حوالي اربع او خمسه يهود. في بيت كان فيه بنتبن مسكرات على حالهن، خلعوا الباب وخشّوا عليهم، البنات شردوا على البيارات، لحقوهم واغتصبوهم.

في بنت خطفوها يهود ملبّس (بتاح تكفا)، اخذها واحد يهودي ربّاها وتجوزها، كان عمرها عشر سنين واهلها فكروا انها ماتت. كانوا يخطفوا بناتنا حتى يكسروا انفنا، حتى يكسروا هيبة العرب.

 

ما اخرجته ام رزق من القرية:

لما طلعنا اخذنا كل اغراضنا، ما ظل في البلد الا الخزانات، كل شي حملناه على اكتافنا

بس القمح والذره حطيناه بالعرباي مع الاولاد الصغار، مشينا مسافه كبيره لا مي ولا زاد، قلت لهم يا جماعه شو بدنا نساوي؟ قالوا: هيّنا وصلنا، واللا شفنا سيارة بالطريق، طلبنا منه يحمّل الاولاد، قال لنا: على الولد ليرتين، قلنا له: كتير هيك، عابود قريبة يا زلمي، من وين نجبلك ليرتين، ما رضي، وبتنا هديك الليله بالطرق والصبح مشينا ونزلنا بعابود. صار القمل علينا طول شبر، والله عمري ما شفت القمل نصه احمر ونصه ابيض الا في عابود، الإهانة اللي عشناها بالتهجير ما خلق بالدنيا انسان انهان مثلها.

طفشنا انا وجوزي واولادي على الزيتون، بدنا نوكل حب زيتون، متنا من الجوع، صاحب الزيتون شافنا وعزمنا نتغدى معه، والله اعطيت ابني فتّه وبنتي فتّه وانا اخدت فتّه اكلناهم وربنا شهيد؛ قال لي انت من وين يا بنت؟، قلت له: انا من كفرعانه، قال لي: شو اسم امك؟، قلت له: فاطمة سعيد المنّح، وصار يعمل هيك (تضرب ام رزق على راسها)، قال: اخ اخ، وصار يضرب على وجهه؛ طلع خال امي، خالها اخو امها.

 

خليتبني عرص وضربتيني على رقبتي

صرنا كل يوم نسرح على الزيتون ونرجع، عملت اربع تنكات زيت، قال لي خالي بدكيش تروحي على بيت اخوالك تتعرفي عليهم، قلت له: يا خالي بفرجها الله، يومها كانت الوكالة تفرّك (توزع) علب لحمه ووقية طحين، (ترفع ام رزق يديها وراسها لفوق وتصرخ)، لمين ولمين هاي الوقيه، لعشره بالدار!، رحت بعدها لأبو رزق، حطّيت ايدي على رقبته، عم بمزح معه، وقلت له: اجانا لحمه، قال لي: خليتيني عرص وضربتيني على رقبتي، العرص اللي بنضرب على رقبته، قلت له: والله يا زلمي انا على نيتي، انا بمزح معك، يقوم يوخذ علبة اللحمة ويضربها علي وتيجي على داني من فوق، لو اجت شوي تحت كنت انقتلت. حملت اولادي الثلاث وطلعت بطريق الجبل، مرقنا على ديوان الثوار، ما سندِت على السند اللي فوق ولا النسوان بلطموا، قعدّت الأولاد وصرت الطم معهم بدون ما اعرف على مين اللطم.

ضلينا نلطم حتى خلصنا، وجوهنا صارت زي التابوت الأحمر، بعدها شفت بنت خالي ورحت معها عند خالي، ولما شاف راسي سألني: مالك؟، قلت له: تقاتلت انا وجوزي وضربني، قال لي: وحيات شارب خالك هاد الاّ راح اخليه ينبش بعوده. صار ابو رزق يبعت ناس من كبار كفرعانة وخالي يطردهم، قال لهم خالي: اذا انتوا اخدتم امها ببلاش، بنتها مش ببلاش.

 

والله ما اطلعنا من بلادنا الا دير ياسين

لم تمض على مجزرة دير ياسين ثلاث اسابيع حتى احتلت قوات الهجاناه قرية كفرعانة والقرى المجاورة. تعاونت الهجاناه على شن عميلة حيميتس (خميره) في 29 نيسان 1948 التي كان هدفها عزل مدينة يافا وتمهيد الطريق للأستيلاء عليها. وقد شارك في هذه العملية ثلاثة الوية، الكسندروني وكرياتي وغفعاتي، حيث احتلت القرى التالية وطهرتها: بيت دجن، كفرعانة، العباسية، صفورية، الخيرية، سلمة، يازور، بالاضافة الى ضاحيتي يافا: جبالية وابو كبير.


عن رهبة المجزرة حدثتني او رزق:

دير ياسين هي اللي اطلعتنا، والله ما اطلعنا من بلادنا الا دير ياسين، فظعوا اليهود فيها، البنت يغتصبوها وابوها وامها واقفين. قسم من اهل دير ياسين نزلوا على يافا والناس صارت تقول لبعضها وفاعت الدنيا. هذا يقول بنتي وهذا يقول اختي وهذا يقول امي، صارت الشباب ترمي حالها على الموت. اللي صارلنا ما صار تحت كتب العرش (..)، الذل اللي انذليناه احنا بفلسطين لليوم ما حدا شافه.

 

بيارة ابن كريون

انشئت مستوطنة يغيل على اراضي القرية عام 1950 كما انشئت نفي افرايم عام 1953. عن مصادرة اراضيها حدثّتني ام رزق ضاحكة: ابوي كان عنده بياره 18 دونم راحت اليوم بمطار ابن كريون (بن غوريون)، مطار اللد، لما بقول ابن كريون بصيروا اولادي يضحكوا علي. لليوم البيارات مصوّرة قبال عيني، بذكر شجره الكينا، بنيت عليها من فوق كرسي، كنت لما افضى اطلع فوق اخيّط وابقى للمغرب.

 

تحيه للختياره اللي واقفة على السيارة

كنت انزل على البيارة اسقي بالليل، اضلني من المغرب للصبح. اللوكس بايدي وانكش واقيم واحط. انا بعجبك (تصفق وتضحك)، لما المخيم عنا اخذ الكاس من الفيصل اطلعوني على السيارة فوق وحطوا المايركفون بفمي وصرت ازغرد وأغني:

احنا الوحداتيات ما فينا دنس

من طيّح الخيّال عن ظهر الفرس

من طيّح الخيال ومنركب مطرحه

وبعدها زغروده (تزغرد)

الناس اللي من فوق صارت تصفّق وتقول تحيه للختياره اللي واقفة على السياره.

اجا محمد ابني وشافني وقال لي: ملعون ابو اللي خلف ابوك، هاي انت؟، حملني وشرد فيي والمصورين يلحقوه بالكاميرا، (تضحك بصوت عال) والله لحقوه...

 

-----------------------------

لقاء خاص مع أم رزق من مواليد 1918، مخيم الوحدات/ الأردن، 532007.

رنين جريس: هي مركزة مشروع التأريخ الشفهي في جمعية "زوخروت"، حيفا




التعليقات (0)

أضف تعليق


الشبكات الإجتماعية

تابعونـا على :

آخر الأخبار من إيلاف

إقرأ المزيــد من الأخبـار..

من صوري

عذراً... لم يقوم المدون برفع أي صورة!

فيديوهاتي

عذراً... لم يقوم المدون برفع أي فيديو !