أم الشهيد نزلت الميدان

أم الشهيد نزلت الميدان
وسألت فين
دمى ابنى هنا ساح؟
يا ناس دلونى على العنوان!
وصرخت أم الشهيد
وقالت ليه
دم ابنى هنا ساح؟
رد الثوار
علشان يجيب
لمصر صباح
بكت أم الشهيد
ونزلت دموعها
وقالت طيب
على مين أصبح أنا؟
وحطت أم الشهيد
منديلها على عينها
وقالت علشان مصر تفتح
لازم أغمض أنا؟!
خلعت أم الشهيد طرحتها
ومسحت بالميدان طرحتها
وأستغربوا الثوار
من فعلتها!
قالت دم ابنى بيصرخ!
فطببت أم الشهيد
وطبطبت عليه بطرحتها
وفضل دم الشهيد يصرخ
ومانفعش معاه طبطبتها
ياحزنها ياقلة حيلتها!
خلعت تطبط بحردتها
ياترى المرة الجايه
هاتخلع أيه من هدمتها؟
ولاسة دم الشهيد بيصرخ
لأن الأقدام اللى قتلته بدباباتها
لاسة حية نابضة برصاصاتها
ومهما طبطبت أم الشهيد
هايصرخ دم الشهيد
لأن اللى قتلوه
لاسة لابسين بدلتهم
وكمان أتأجلت محاكمتهم
أبكى يا أم الشهيد
عددى يا أم الشهيد
صرخت أم الشهيد
وقالت راح الشهيد
يجيب لمصر صباح
راح الشهيد ضحيه!
سال دم الشهيد
بدون ديه!
أبكى يا أم الشهيد!
عددى يا أم الشهيد!
لأن المحاكم أتأجلت
لمحاكمة ربانيه!
لأن محكمة البشر
غير شرعيه!
ومهما طبطبت بطرحتها
ومهما تتعرى من هدمتها
هأ يصرخ دم الشهيد
وكأنه سال من جديد
أبكى يا أم الشهيد