أستاذي عذرا أنا من هذا الجيل

أستاذي عذرا أنا من هذا الجيل
وأنا أشاهد القنوات التلفزيونيه التي لا هم لها اليوم الا الاحداث في مصر وما يجري من ثوره شبابها شاهدت بالصدفه في احد البرامج التحليليه أستاذ فاضل لي كان يدرس لي في الجامعه ماده علم الاجتماع السياسي
الدكتور الفاضل كان يشيد بالشباب وما حققوه من مكاسب سياسيه ووعيهم الثقافي وتحضرهم وانهم هم امل مصر وقلبها النابض ... الخ
عادت بي الذكريات الي الوراء تذكرت وانا في المرحله الثالثه من الجامعه وفي احدي المحاضرات دخل علينا الدكتور ووجوهه تعلوه علامات الغضب والضيق وانفجر بنا بلا مقدمات أنني حزين علي مصر وخايف عليها منكم أنتم جيل ما يعلم بيه الا ربنا جيل خيبان عدمان مالوش هدف غير الجلوس عالنت والشات والتعرف عالبنات جيل البنطلونات الضيقه والبديهات الملزقه جيل تافه مش متخيل انه ممكن يطلع منه واحد يكون قائد او مسئول جيل المفروض يرفع رايه مصر ولكن للأسف خلي الرايه في الارض ربنا يستر علي مصر منكم
أستفزني الكلام جدا ورفعت أيدي طالب أني أعلق علي الكلام
أذني الدكتور اني أتكلم وقالي قول ياسيدي
حضرتك بتحمل جيلي مسئوليه كل البلاوي اللي موجوده رايه ايه اللي سيادتك بتتكلم عليها الرايه دي أحنا مستلمنهاش منكم أساسا هو الجيل المشوه داه مين اللي مربيه مش جيلكم وحضرتك عارف يعني ايه تنشئه اجتماعيه واساليبها واساسها أحنا جيل مظلوم في كل حاجه جيلك لحق حاجه من خبر وبركه مصر لكن أحنا عاطلين محبطين والسبب أنتم اللي ضيعتو حقوقنا النظام زرع جواكم الخوف وأنتم زرعتوه جوانا من الصغر احنا جيل ممكن يكون مشوه صحيح بس داه بسبب ان احنا لم نجد اللي يدلنا او يوجهنا ودلوقتي بتحملونا المسئوليه اللي انتوا فشلتم فيها ايه تقدر حضرتك تقولي ايه اللي انتوا عملته للبلد دي ولا لينا
أجاب محتدا كتير جدا ويكفي جيلي انه حارب علشانكم وحرركم سيناء احنا يكفينا حرب أكتوبر حتي لو لم نقدم لكم غيرها..
قولته سيادتك محدش يقلل من اللي حاربوا وضحوا بحياتهم علشان مصر لكن حرب أكتوبر دي كانت تصحيح لأخطاء نفس الجيل ومع أحترامي أنتوا هزمتم عدو خارجي وأنهزمت أمام العدو الداخلي داه أنتم حتي ما حاولتوش تواجهوه سبتو البلد ليهم لحد ما بقت بلادهم وأحنا ضيوف عليها ويادكتور داه حتي الضيف ليه واجب بيخده لكن أحنا بدون أي حقوق أو واجبات ورفعتم لينا شعار متقولش مصر أدتنا أيه قول أحنا ها ندي مصر أيه
هنا أشار الي الدكتور بالجلوس أقعد يابني أقعد هي دي مشكلتكم مستنين تأخدوا علشلن تعطوا
حاولت الكلام ولكنه لم يسمح لي قائلا ورانا محاضره عايزين نشرحها
دكتوري الفاضل أنا من الجيل داه اللي سيادتك دلوفتي بتقول حقق لمصر اللي ما تحققش قبل كده هو داه جيلي جيل النت والفيس بوك