أخرج من معطفه الجريدة!

(يعربي في لندن ومن معطفه اخرج جريدة)
والحمام يداعبه في لطف من خلف وامامه

من بدأ يقرا عن بلاده والاخبار الجديده
طارت اسراب الحمام ولا بقي حوله حمامه

الطيور تخاف من اخبارنا لو هي بعيده
كل ما تسمع خبر عنا تبي منا السلامه

كل طير يخاف لا شاف عربي يكتب قصيدة
يحسب البندق معه والصفر في داخل حزامه

يا مهاجر عن بلد هارون خبر عن زبيده
اننا جوعى وهي ترقد على ريش النعامه!

وانها منا باشارة رمش تاخذ ما تريده
شاركت حتى الفقير المعدم بماه وطعامه!

وان حتى الطير لو يدخل حماها ما نصيده
دام خاتمها على ريشة جناحينه علامه!

في بلادك يا مهاجر يحمي السارق رصيده
والشريف يمر يوم العيد ما يلقى العمامه!

البس المعطف ولف الشال واحذف با الجريده
تصبح اول يعربي يكسب من الطير احترامه!!