أبو الهول و نقابه الصحافيين

العواف عليكم يابا الحاج أبو الهول .. إزيك كيديه وإزاي لَحوال والنبي ليك وحشِه .. اليومين دولَم الدُنيا برد علاوليه والناس كُلاتها كمشانِه م البرد بس أني جولت آجي أزورك وأجعد وياك نِتحدت شويه ف حوال البلد ..
شوفت يابا الحاج أبو الهول اللي حوصول ف ولا مؤاخذيه النقابه بتاعه الصوحافيين .. إيويه كان حِداهم إنتخابات موت وكان مِترشَح مكرم أفندي الريس الجديم ورشوان أفندي مِتنافس وياه ..
لا يابا الحاج أبو الهول كان فيه ناس تانيه ياميه مِترشحين بس ولا مؤاخذيه اللجنه اللي ماسكه لنتخابات إستبعدَتهم .. لا العلم عند الله يمكن ما كانوش علي وضوهم والا حاجيه والا ماكانش حِداهم شهادات نَحو الاُميه ..
المهمن يابا الحاج أبو الهول الموضوع كُلاته إتصفصف علي جوز مِترشَحين مكرم أفندي ورشوان أفندي وباجي المترشَحين ناس منهم جالت حيسبنا الله ونِعْم الوِكيل وناس منهم طعنُم .. إيويه أنا سمعت كيديه طعنُم حيدا المحكمه بتاعه الطُعون ..
المهمن يابا الحاج أبو الهول الصوحافيين كُلاتهم إنتخبُم والنتيجه ظوهرِت لم ينجح أحد زي ولا مؤاخذيه مدرسه المساعي المشكوريه .. جوم إيه جالوم نعيد لنتخابات تاني حتما ولابد ولازوما نفر م لتنين ينجح وكلام الناس كوتر ف اليومين اللي فاتم .. ناس جالَت الحكومِه عايزه مكرم أفندي وحتما ولابد ولزوما ينجح وناس تانيه ردت عليهم وجالت هيه ولامؤاخذيه الحكومه عملت أيه لصوحافيين جَبْل كيديه ؟
جام الناس الأولنيين جالوم مكرم أفندي جال "وعدُن عليا لو نَجحت كل نفر م الصوحافيين ياخُد جلابيه كستور مِفتِخِر من بتاع زمان يلبسها ف الشاليه اللي ح نسَكِنُه فيه ف مرينه"
والنبي يابا الحاج أبو الهول الصوحافيين كُلاتهم جَعدُم طوله الليل يهتفوا ويجولوا يا حبيبتي يامصر يا حبيبتي يامصر .. مصر هي ولا مؤاخذيه الست أمي .. لحد الصبح والصبح كلاتهم راحوا ع لنتخابات ونتخبوا مكرم أفندي والحمد لله مكرم أفندي نجح بالسُلُس وبجي ريس الصوحافيين ..
المُهِمَن هِلوجتي يابا الحاج أبو الهول الجماعه الصوحافيين كُلاتهم جاعدين فريح باب النِقابه مستنيين الجلاليب الكستور المِفتِخريه ومفاتيح الشاليهات بتاعه مرينه ..
تفتكر يابا الحاج أبو الهول الحكومه ح تديهم الجلاليب والا حَتديهم حاجه تانيه ؟؟
أستر ع الحاجه التانيه يارب ...
مجدي المصري