أبو الهول و فرح رئيس الوزرا

العواف عليك يابا الحاج أبو الهول .. إزيك كيديه وإزاي لَحْوال .. إيويه آني شايفك مِتبَسم إيويه الشعب كُلاتُه مِتبَسم وفرحان رَبونا يجعل إيامنا كُلاتها أفراح وليالي مْلاح .. الناس كُلاتها فرحانِه من يوم ما صدر البيان بِتاع رياسه الوزرا إن البيه رئيس الوزرا ح يتجوَز .. وبعدين كمان البيه رئيس الوزرا ديه أطول راجل ف بر مصر كُلاته حتما ولابد ولازوما البيه رئيس الوزرا عازمك ع الفرح بتاعه عشان يبجا فيه واحد طويل وياه ..
لأ .. البيه وزير الماليه هُوَن الوحيد اللي م إتعزمشي ف الفرح أصل اليومين دولَم يومين الإقرارات الضريبيه ولو البيه وزير الماليه حضر الفرح ح يحصل ضرايب جواز من البيه رئيس الوزرا وبعدين ديه كلام برضَك ..
المُهِمَن يابا الحاج أبو الهول الناس كُلاتها ف البلد بيجولُم إن يوم الفرح ديه ح يكون يوم عيد للشعب كُلاتُه أصل البهوات الكُبار بتوع التلافونات والأوموباللات حالفين يمين تلاتيه ولا مؤاخذيه يعملوا واجب ويا البيه رئيس الوزرا ف يوم فَرحُه ..
إيويه اليوم ديه ح يكون يوم ميمون أصل التلافون ولامؤاخذيه الأرضي ح يكون ببلاش وكمان ح يتوزع خطوط أومباللات ببلاش ع الناس وكمان دجايج مجانيه والجماعيه بتوع ال0999 ح يدوا الناس جوايز يامِه وكمان النت ب بلاش أمال إيه لازم يعْمِلوم واجب ويا البيه رئيس الوزرا يوم فرحه هُمَّن حيداهُم أعز م البيه رئيس الوزرا ..
لأ .. يابا الحاج أبو الهول يوم الصباحيه إن شاء الله ح يعوضوا ديه كُلاته من دم الناس الدَجيجه بخمسه جنيه والحسابه بتحسيب أمال إيه البيه رئيس الوزرا ف شهر العسل وهمن يخلوا عدادات لتصالات توِر وَر علي م يرجع من شهر العسل .. لا مش ح يسافر بره هوَن ح يْجضي شهر العسل ف القريه الذكيه ..
المهمن يابا الحاج لما يرجع بالسلاميه من شهر العسل حتما ولازوما البيه رئيس الوزرا يرد الجمايل ويا الناس دِيان ..
تعرف يابا الحاج أبو الهول لو آني مطرح البيه رئيس الوزرا كنت إديت أساميهم كلاتهم للبيه وزير الماليه يحِش وسطُهُم ضرايب وبعدين البيه رئيس الوزرا يتوسط ليهم حيدا البيه وزير الماليه يعملهم خصم آهو كيديه يرد الجمايل ومن دَجْنُه وفْتللوا ..
أستر علي دَجْنُه يارب
مجدي المصري